४ मंसिरको चुनावी मैदानमा उत्रिँदै ८७ दल
काठमाडौं– निर्वाचन आयोगले ४ मंसिरमा हुने प्रतिनिधिसभा तथा प्रदेशसभा निर्वाचनमा ८७ दलले प्रतिस्पर्धा गर्ने बताएको छ ।चुनावमा प्रतिस्पर्धा गर्न दर्ता भएका ८७ दलमध्ये प्रतिनिधिसभा सदस्य निर्वाचनमा ७९ दलका निर्वाचन चिह्न मतपत्रमा कायम रहने आयोगका उपसचिव सूर्यप्रसाद अर्यालले बताए ।
उनका अनुसार प्रदेशसभा निर्वाचनका लागि भने प्रदेश १ मा ७० दलले ६२ वटा चुनाव चिह्नबाट प्रतिस्पर्धा गर्दै छन् ।
मधेस प्रदेशमा ७५ दलले ६७ वटा चुनाव चिह्न, बागमती प्रदेशमा ७२ दलले ६४ निर्वाचन चिह्न, गण्डकी प्रदेशमा ६६ दलका ५८ वटा चुनाव चिह्न मतपत्रमा हुने आयोगले बताएको छ ।
यसैगरी लुम्बिनी प्रदेशमा ६८ दलका लागि ६० वटा, कर्णाली र सुदूरपश्चिममा प्रतिप्रदेश ६४ दलका लागि ५६ वटा निर्वाचन चिह्न मतपत्रमा छापिनेछ ।
आउँदो निर्वाचनको मतपत्रमा नेकपा एमालेको चुनाव चिह्न एक नम्बरमा रहनेछ ।२०७४ मा भएको प्रतिनिधिसभा तथा प्रदेशसभा निर्वाचनमा समानुपातिक निर्वाचन प्रणालीतर्फ प्राप्त गरेको मत संख्याको आधारमा एमालेको चुनाव चिह्न सूर्य पहिलो नम्बरमा हुने आयोगका सहप्रवक्ता अर्यालको भनाइ छ ।
दोस्रोमा नेपाली कांग्रेस र तेस्रोमा नेकपा माओवादी केन्द्रको निर्वाचन चिह्न हुनेछन् ।अहिले संघ र प्रदेशमा सांसद रहेका दललाई समानुपातिक निर्वाचन प्रणालीबाट प्राप्त मतको आधारमा दलको क्रम निर्धारण गरेको आयोगले जनाएको छ । प्रतिनिधिसभा तथा प्रदेशसभामा प्रतिनिधित्व नगर्ने दलको हकमा भने आयोगमा दल दर्ता भएको क्रममा आधारमा दल एवं उम्मेदवारको चिह्न मतपत्रमा समावेश गरिनेछ ।
आयोगले राष्ट्रिय यथार्थवादी पार्टी नेपाललाई मोटरसाइकल, सामाजिक लोकतान्त्रिक पार्टीलाई तीनढुंगे अगेनो र त्रिमूल नेपाललाई ओदान निर्वाचन चिह्न प्रदान गरेको छ । दल दर्ताको निवेदन पेस गर्दा माग गरेअनुसारकै चुनाव चिह्न दिएको आयोगमा सह–प्रवक्ता एवं उपसचिव अर्यालले बताए ।
निर्धारण गरिएका निर्वाचन चिह्न आयोगले नेपाल राजपत्रमा प्रकाशन गर्नेछ ।नेकपा माओवादी केन्द्रको निर्वाचन चिह्नबाटै चुनावी मैदानमा उत्रिने दलहरूले छुट्टै दल दर्ता गर्नुपर्ने छैन ।आयोगले विज्ञप्ति निकालेर माओवादी केन्द्रकै निर्वाचन चिह्नबाट चुनाव लड्ने नेकपा समाजवादी एक, नेपाल समाजवादी पार्टी, नेपाल दलित पार्टी र आधुनिक नेपाल समाजवादी पार्टीले अलग्गै दल दर्ता गर्नु नपर्ने जानकारी दिएको हो ।
५ राजनीतिक दलले एकल चुनाव चिह्न लिएर निर्वाचनमा सहभागी हुने निवेदन दिएकाले राजनीतिक दलसम्बन्धी नियमावली, २०७४ को व्यवस्थाबमोजिम आयोगले छुट्टै दलको रूपमा दर्ता नगर्ने निर्णय गरेको हो ।







