आउँदो चुनावमा बहुमत ल्याउने एमालेको अभियान
काठमाडौं– नेकपा एमालेले आगामी ४ मंसिरमा हुने प्रदेशसभा तथा संघीय चुनावमा आफ्नै नेतृत्वमा बहुमतको सरकार बनाउने लक्ष्यसहित अभियान सञ्चालन गर्ने भएको छ ।पार्टी मुख्यालय च्यासलमा मंगलबार बसेको स्थायी कमिटी बैठकको निर्णयबारे जानकारी दिँदै एमाले उपमहासचिव तथा प्रचार विभाग प्रमुख पृथ्वीसुब्बा गुरुङले यस्तो बताएका हुन् ।
उनले एमालेको एकल बहुमतको सरकार बनाउने घोषणासहित पार्टीले चुनावी अभियान सञ्चालन गर्ने जानकारी दिए ।गुरुङले सञ्चारकर्मीसँग कुरा गर्दै एमालेको चुनावी अभियानको रणनीतिलगायतका विषय समेटेर अध्यक्ष केपी ओलीले १०–११ भदौको केन्द्रीय कमिटी बैठकमा राजनीतिक प्रतिवेदन पेस गर्ने कार्यक्रम रहेको बताए ।
‘अहिले एमाले कुन ठाउँमा छ। सत्तारुढ गठबधन के गर्दैछ, अरू दल के गर्दैछन्, हामी कसरी जान सक्छौं,’ उनले भने, ‘हाम्रो लक्ष्य आगामी सरकार नेकपा एमालेको, त्यो पनि बहुमतकै हुने भन्ने रहेको छ ।’
बैठकमा अध्यक्ष ओलीले सहभागीसँग १० भदौको केन्द्रीय कमिटी बैठकमा पेस गर्ने राजनीतिक प्रतिवेदनबारे सुझाव लिएका थिए ।
गण्डकीबाहेक ६ प्रदेशका इन्चार्जले प्रदेशमा पार्टीको अवस्थाबारे जानकारी गराएका थिए ।







