प्रचण्ड–नेता नेपाल समूहको नेकपाद्वारा आन्दोलन घोषणा
नेकपाको प्रचण्ड–माधव नेपाल पक्षले एक महिने लामो दोस्रो चरणको आन्दोलन घोषणा गरेको छ । शनिबार पूर्वमाओवादी मुख्यालय पेरिसडाँडामा बसेको आन्दोलन परिचालन समितिको बैठकले पार्टी संगठन पुनर्गठन र संघर्षका कार्यक्रम एकसाथ अघि बढाउने निर्णय गरेको हो ।
बैठकका निर्णय सार्वजनिक गर्न आयोजित पत्रकार सम्मेलनमा संयोजक नारायणकाजी श्रेष्ठले दोस्रो चरणको आन्दोलनका कार्यक्रमबारे जानकारी दिएका हुन् । कार्यक्रमअन्तर्ग देशभर विरोध प्रदर्शन, भेला, मसाल जुलुस, सभा र विभिन्न राजनीतिक दलहरूसँग अन्तरक्रिया चलाइनेछ ।
आन्दोलनका क्रममा संविधान वाचन तथा व्याख्या गर्ने कार्यक्रम समेत राखिएका छन् ।
२३ माघमा राजधानीमा विरोध प्रदर्शन र सभा गर्ने कार्यक्रम राखिएको छ । नेकपाको एउटा गुट पार्टीबाट अलग भएको छ । प्रतिनिधिसभा पुनःस्थापनाको मागमा विपक्षी दलहरूको संयुक्त आन्दोलन गर्ने प्रयास असफल भएपछि प्रचण्ड–माधव पक्षले एक्लै आन्दोलन गर्न लागेको हो ।
सुदूरपश्चिम प्रचण्ड–नेपाल समूहमा पहिरो जाने संकेत, प्रदेश सरकारलाई रातो घन्टी
सुदूरपश्चिम प्रदेश सभाका ६ जना माधव नेपाल–पुष्पकमल दाहाल समूहका सांसद प्रधानमन्त्री केपी ओली नेकपामा आएपछि सुदूरपश्चिमको सरकार धर्मराउने संकेत देखिन थालेको छ ।
६ जना प्रदेश सांसदले शनिबार दिउँसो प्रदेश पार्टी कार्यालयमा मुख्यमन्त्री तथा प्रदेश संसदीय दलका नेता त्रिलोचन भट्टले डाकेको संसदीय दलको बैठकमा गरिएको ३ वटा निर्णयमा हस्ताक्षर गर्न इन्कार गर्दै प्रधानमन्त्री ओलीको पक्षमा रहेको संकेत गरेका हुन् ।
प्रदेश सभा सदस्य पठानसिंह बोहरा, लीलाधर भट्ट, गेल्बु बोहरा, महेशदत्त जोशी, नेपालु चौधरी र रतन थापाले उक्त निर्णयमा हस्ताक्षर नगरेका हुन् ।
बैठकमा प्रधानमन्त्री ओलीले गरेको प्रतिनिधिसभा विघटनको विरोध, फुट अनि विग्रहमा नलाग्न पार्टी कार्यकर्तालाई आह्वान गर्दछ र नेकपाको प्रदेश सभाका सदस्य विधानसम्मत बहुमतको पक्षमा रहेको स्पष्ट पार्दछ भन्ने ३ बुँदे निर्णय गरिएको छ ।
बैठकमा सहभागी ३६ मध्ये बाँकी ३० जना सांसदले भने उक्त निर्णयमा हस्ताक्षर गरेको दाबी गरिएको छ । बैठकमा नेकपाका प्रदेश इन्चार्ज भीम रावल पनि सहभागी थिए ।
प्रदेश सभामा ५३ जना सदस्य छन्, जसमध्ये ३९ जना नेकपाका सांसद छन् ।







