बेलायतमा नयाँ कोरोना भाइरसको त्रास, नेपाल प्रवेश रोक

नेपाल सरकारले बेलायतबाट नेपाल प्रवेशमा रोक लगाउने निर्णय गरेको छ । मंगलबार बसेको कोभिड नियन्त्रण उच्चस्तरीय निर्देशक समितिको बैठकले बेलायतबाट नेपाल आउने सम्पूर्ण यात्रुलाई प्रवेशमा रोक लगाउने निर्णय गरेको हो ।
यस्तै, निर्देशक समितिले बेलायतबाहेक अन्य देशबाट बेलायतको ट्रान्जिट हुँदै नेपाल आउनसमेत रोक लगाएको छ ।
प्रधानमन्त्री तथा मन्त्रिपरिषद्को कार्यालयका सचिव महेन्द्रप्रसाद गुरागाईंले बेलायतमा नयाँ भाइरस देखिएको र भाइरस पहिलेभन्दा बढी संक्रामक पाइएपछि बेलायतबाट नेपाल प्रवेशमा रोक लगाउने निर्णय गरिएको बताए । युरोपियन युनियनले बेलायतसँग सीधा उडान र आवतजावत रोकेपछि नेपाल सरकारले पनि नेपाल प्रवेशमा रोक लगाएको उनले जानकारी दिए ।

बैठकले १ पुसयता नेपाल आएकाहरुलाई अनिवार्य रुपमा ७ दिन क्वारेन्टाइन बसी जाँच गरेपछि मात्र घर जान अनुरोध गरेको छ । यस्तै, नेपाल आउन ट्रान्जिटमा रहेकाले अनिवार्य रुपमा १० दिन होटल क्वारेन्टाइन बसी परीक्षण गरेर मात्र घर जान पनि सरकारले अनुरोध गरेको छ ।
बेलायतमा भेटिएको कोरोना भाइरसको नयाँ प्रकारले संसारभरीको चिन्ता बढाइरहेको छ । थुप्रै देशले बेलायतमा यात्रा प्रतिबन्ध लगाएका छन् ।
बेलायतमा कोरोना भाइरसको नयाँ रुपले धेरैलाई बिरामी पारिरहेको छ । संक्रमितको संख्यामा दिनानुदिन वृद्धि हुन थालेपछि र अस्पतालले बिरामीको चाप धान्न नसक्ने स्थिति सिर्जना हुन थालेको छ । फलतः बेलायतले चौथो चरणको लकडाउनको घोषणा गरेको छ ।
बेलायत सरकारका सल्लाहकारका अनुसार यसअघिका भन्दा यो नयाँ रुपको कोराना भाइरस बढी संक्रामक छ ।