नेकपामा रमिता, ओली–प्रचण्डबीच एकअर्कालाई कारबाही
प्रधानमन्त्री केपी ओलीले प्रतिनिधिसभा विघटन गरेर आउँदो वैशाखमा चुनावको मिति तोकेपछि भुसको आगो भएको नेकपाभित्रको झगडा छताछुल्ल भएको छ । पार्टीभित्रको रडाकोकै कारण एकमुखे नेकपा दुईमुखे बन्ने लक्षण देखिएको छ ।
नेकपाका दुवै समूह ओली र पुष्पकमल दाहाल–माधव नेपाल पक्षले एकै दिन दुईतिर केन्द्रीय समिति बैठक बोलाएका छन् ।
ओली पक्षले मंगलबार बिहान ९ बजे बालुवाटारमा केन्द्रीय समिति बैठक बोलाएको हो भने प्रचण्ड–नेपाल पक्षले दिउँसो १ बजे बैठक बोलाएको हो ।
सोमबार बस्ने भनेको प्रचण्ड–नेपाल पक्षको स्थायी समिति बैठक पनि मंगलबार नै बस्ने भएको छ ।
नेकपा केन्द्रीय कार्यालयका दुई कार्यालय सचिवले सचिवले फरक–फरक बैठकका लागि एसएमएस पठाउँदै जानकारी गराएका छन् ।
प्रचण्ड–नेपाल समूहले आइतबार नै स्थायी कमिटीको बैठकबाट निर्णय गराएर ओलीलाई अनुशासनको कारबाही गर्ने प्रस्ताव ल्याउने बताएको थियो । प्रचण्ड पक्षको यस्तो तयारी थाहा पाएपछि ओली समूहले पनि बैठक बोलाएर प्रचण्ड–नेपाल समूहलाई कारबाही गर्ने योजनाअनुसार बैठक बोलाएको हो ।
सोमबार बानेश्वरमा बसेको प्रचण्ड पक्षको भेलाले असंवैधानिक काम गर्ने प्रधानमन्त्रीसमेत रहेका अध्यक्ष ओलीलाई कारबाही गरेको घोषणा गरेको छ ।
ओलीले आफूलाई घेराबन्दीमा पारेर काम गर्न नदिएकाले संविधानअनुसारै संसद् भंग गरेको दाबी गरेका छन् भने प्रचण्ड पक्षले संसद् भंग गर्ने कुनै आधार नभएकाले भंग नभएको प्रस्टीकरण दिएको छ ।







