ओली–देउवा भेटबारे बोल्यो कांग्रेस प्रधानमन्त्रीले सत्ताको अफर गरेका होइनन्
गत शनिबार बालुवाटारमा प्रधानमन्त्री केपी ओलीले प्रतिपक्षी नेता तथा कांग्रेस सभापति शेरबहादुर देउवासँग सत्ता समीकरणको प्रसंग कोट्याएको सार्वजनिक भएपछि कांग्रेस प्रवक्ता विश्वप्रकाश शर्माले त्यसको खण्डन गरेका छन् । नेकपाभित्रको किचलोले वाक्क भएका प्रधानमन्त्री एवं पार्टी अध्यक्ष ओलीले देउवासँग सत्ता समीकरणको बोली मिलाएको राजनीतिक वृत्तमा चर्चा चल्दै आएको छ ।
प्रधानमन्त्री ओलीले सभापति शेरबहादुर देउवासँग गरेको भेटवार्तालाई सत्ता साझेदारीसँग नजोड्न प्रवक्ता शर्माले आग्रह गरेका छन् । प्रधानमन्त्री र प्रतिपक्षी दलका नेताबीच भेटघाट र संवाद हुनु सकारात्मक भएकाले सत्ता साझेदारीसँग जोड्न नहुने शर्माको तर्क छ ।
शनिबार प्रधानमन्त्री ओली र कांग्रेस सभापति देउवाबीच बालुवाटारमा घटौं भेटवार्ता भएको थियो ।
कांग्रेस प्रवक्ता शर्माले संसदीय प्रणालीमा प्रधानमन्त्री र प्रतिपक्षी दलका नेताको बीचमा हुने भेटघाटका निश्चित विषयवस्तु र कार्यसूची हुनैपर्छ भन्ने नभएको बताए ।
‘सामान्यतया संसदीय प्रणालीमा प्रधानमन्त्री र प्रतिपक्षी दलका नेताबीचमा भेटघाट हुनका लागि यो विषयवस्तु र त्यो विषयवस्तु भनेर सूचीका साथ हुनुपर्छ भन्ने कुरा उचितजस्तो लाग्दैन । लोकतान्त्रिक व्यवस्थालाई सबल बनाउने हो भने निरन्तर भेटघाट र संवाद हुनु राम्रो कुरा हो,’ उनले भने ।
प्रधानमन्त्रीले सत्तामा सहभागी गराउन कांग्रेसलाई ‘अफर’ गरेको हो कि भन्ने आशंका नगर्न पनि उनले आग्रह गरे ।







