अर्थतन्त्रमा कोरोना प्रभाव नेपालको आर्थिक वृद्धि सन् २०२१ मा ०.६ प्रतिशतमा सीमित हुने अनुमान
विश्व बैंकको दक्षिण एसियाली आर्थिक प्रतिवेदनअनुसार कोरानाका कारण गरिएको लकडाउनले यस क्षेत्रको आर्थिक गतिविधि प्रभावित भएको देखिएको छ । पर्यटन क्षेत्रमा भएको ठूलो क्षतिका कारण नेपालको आर्थिक वृद्धिदर सन् २०२१ मा ०.६ प्रतिशतमा सीमित हुने अनुमान गरिएको छ ।
बिहीबार सार्वजनिक गरिएको अर्धवार्षिक अपडेटका अनुसार महामारीको असर जारी रहेका कारण दक्षिण एसिया यस वर्ष हालसम्मकै खराब मन्दीमा डुबेको छ । यसले अनौपचारिक क्षेत्रका कामदार सबैभन्दा बढी मारमा परेका छन् भने लाखौं मानिस चरम गरिबीमा धकेलिँदै छन् ।
पछिल्ला पाँच वर्षमा लगातार वार्षिक ६ प्रतिशत हाराहारी रहेको दक्षिण एसियाको आर्थिक संकुचन दर सन् २०२० मा ७.७ प्रतिशतले संकुचित हुने आकलनसहितको उक्त प्रतिवेदनले तीव्र आर्थिक गिरावट हुने प्रक्षेपण गरेको छ ।
सन् २०२१ मा क्षेत्रीय वृद्धि ४.५ रहने प्रतिवेदनको अनुमान छ । जनसंख्या वृद्धिको अनुपात हेर्दा यस क्षेत्रको प्रतिव्यक्ति आय सन् २०१९ मा अनुमान गरिएभन्दा ६ प्रतिशतले कम रहनेछ । विप्रेषणमा आएको गिरावटका कारण अति विपन्नले आयस्रोत गुमाउने अवस्था रहेको प्रतिवेदनमा औंल्याइएको छ ।
‘महामारीले अर्थतन्त्रमा पारेको प्रभाव र त्यसले नेपालका मानिसको जीविकोपार्जनमा पारेको असरले अनौपचारिक कामदार वा सामाजिक सुरक्षा र सहायतामा नसमेटिएका मानिसलाई सबैभन्दा गम्भीर असर पर्ने अनि उनीहरू चरम गरिबीमा धकेलिने सम्भावना छ,’ माल्दिभ्स, नेपाल र श्रीलंकाका लागि विश्व बैंकका राष्ट्रिय निर्देशक फारिस हदाद जर्भोसले भने ।
नेपालमा अनौपचारिक व्यवसायमा करिब ५० प्रतिशत उद्यम पर्छन् भने यी उद्यम अधिकांश श्रमजीवीको कमाइको मुख्य स्रोत हो ।
यो समूहमध्ये सहरी अनौपचारिक क्षेत्रका कामदार र सहरी क्षेत्रका स्वरोजगार परिवार सबैभन्दा बढी जोखिममा रहेको विश्व बैंकले औंल्याएको छ ।







