डा. ओममूर्ति लिखित ‘जीवन्त सम्बन्ध’ प्रकाशित
काठमाडौं–वरिष्ठ मुटुरोग विशेषज्ञ डा. ओममूर्ति अनिलद्वारा लिखित ‘जीवन्त सम्बन्ध’ पुस्तक प्रकाशित भएको छ।जीवन सम्बन्ध, संस्कार, संस्कृति, पारिवारिक सम्बन्ध, संघर्ष, सन्तानद्वारा आमाबुबाको हेरचाह, सफलता, असफलता, सुखदुःख र पीडालगायतका विषयमाथि संस्मरणात्मक शैलीमा पुस्तक लेखिएको छ।
पुस्तकमा सम्बन्धको गहिराइलाई केलाइएको छ। त्यस्तै, व्यक्तिको कर्तव्य, सोच र दायित्यलगायतका विषयमाथि केन्द्रित हुँदै मानिसको सोचमा सकारात्मक परिवर्तन ल्याउन सक्ने विश्वास लेखकको छ।पुस्तकले सामाजिक रुपान्तरण, पारिवारिक दायित्व एवं पेसागत जिम्मेवारीलाई निर्वाह गर्न हौसला दिन सक्छ।
२४० पृष्ठको पुस्तकमा ५३ वटा जीवन उपयोगी खण्डलाई संस्मरणात्मक रूपमा समेटिएको छ। पुस्तक प्रकाशनको मूल उद्देश्य पुस्तकको बिक्रीबाट प्राप्त हुने सम्पूर्ण रकम असहाय वृद्धवृद्धाका निम्ति डा. ओम फाउन्डेसनमार्फत खर्च गरिने डा. अनिलले बताए।
५ असोजमा बजारमा आउने पुस्तक २९ भदौदेखि अनलाइन बुकिङ खुला भएको छ। दराज, ई–सेवा, हाम्रो पात्रो अनलाइनलगायतका प्लेटफर्म, डा. ओम फाउन्डेसनको वेबसाइट तथा लेखककै फेसबुक पेजमार्फत अनलाइन बुकिङ हुनेछ।पुस्तकको काठमाडौं उपत्यकाभित्र निःशुल्क होम डेलिभरी हुनेछ। पुस्तक विभिन्न सुपर स्टोर एवं कफी सप तथा क्याफे आउटलेटमा समेत उपलब्ध हुनेछ।
पुस्तकको आवरण पृष्ठ लेखक डा. अनिल, श्रीमती मनीषा, छोरी अनिशा र आरभले संयुक्त रूपमा अनावरण गरेका थिए।
