गोपी र अष्टनारायणले बचाइदिएको कलाकारको स्टारडम
हरेक शुक्रबार नयाँ नेपाली चलचित्र रिलिज हुन्छन् । तर, चलचित्रका निर्माता र कलाकारहरु भने शनिबारको पर्खाइमा रहन्छन् । कारण शनिबार हलहरुमा दर्शकहरुको बढि घुँईचो हुन्छ ।
जब शनिबार आउँछ, सेलिबि्रटीहरुसहित निर्माण टोली विभिन्न हलहरुमा पुग्छ, र दर्शकको भीडसँग फोटो खिचाएर फेसबुकमा हालिन्छ । यस्तो फोटो प्राय दुई हलको राखिन्छ, चाबहिल स्थित गोपिकृष्ण मुभीज र बालाजुस्थित अष्टनारायण । नेपाली चलचित्रले काठमाण्डौमा सर्वाधिक दर्शक तान्ने यीनै दुई हल हुन् ।
तर शनिबार यी दुई हलमा भीडसहितको फोटो कुनै कलाकार, निर्माताले फेसबुकमा पोष्ट गर्यो भन्दैमा चलचित्र सुपरहिट भएछ भन्ने भ्रममा नपर्नुस ।
किन देखिन्छ भिड ?
गोपिकृष्ण हलमा एकसाथ ७ वटा चलचित्र रिलिज हुन सक्छन् । ७ वटा पर्दामा चलचित्र हेर्न आएका दर्शक कुनै नयाँ रिलिज भएको नेपाली चलचित्रको सेलिबि्रटी पुग्दा एकै ठाउँमा भेला हुन्छन् । यसले गर्दा ठूलो मास दखिन्छ ।
अष्टनारायणको अवस्था पनि त्यस्तै हो । एकसाथ २ हजार दर्शक भित्र छिर्दा र बाहिर निस्कदा अष्टनारायण जाने बाटो पुरै जाम हुन्छ । जसले गर्दा निर्माता र कलाकारले ठूलो भिड देखाउन सक्छन् ।
अझ, कलाकारसँग तस्बिर खिच्नेको तँछाडमछाड हुन्छ । थरी-थरीका फ्यान हलमा भेटिन्छन् । रुने-कराउने फ्यान पनि यीनै हलमा भेटिन्छन् । अझ, कुनै कलाकार दर्शकको भीडमा गयो भने उसलाई जुरुक्कै बोकेर हुटिङ गर्न पनि पछि पर्दैनन् । यही भिडलाई आफ्नो ‘फ्यान फलोइङ’ मान्दै आत्मरतिमा रमाउँछन् सेलिबि्रटीहरु । यसरी कुनै अमुक कलाकारको स्टारडम गज्जबले जोगाइदिएका छन् यी दुई हलले । यदि, ती दुई हलमा चलचित्रका कलाकार र निर्माता पुगेनन् भने सम्झनुहोस्, त्यो चलचित्रले पानी पनि माग्न पाएनछ ।
मल्टिप्लेक्स्का दर्शक फरक
मल्टिप्लेक्स हलमा पुग्ने दर्शक कलाकारप्रति त्यती क्रेजी भावमा प्रकट हुँदैनन्, जति सिंगल हलका दर्शकमा देखिन्छ । सेल्फी खिच्ने, कुराकानी गर्ने गरेता पनि हुटिङ नै गर्ने, कलाकारलाई नै बोक्ने काम मल्टिप्लेक्समा पुगेका दर्शकले गरेको पाइदैन । जसकाकारण, ठूलो मास र हल्लाखल्ली मल्टिप्लेक्समा कलाकार पुग्दा देखिदैन ।
काठमाडौ लगायत देशभर मल्टिप्लेक्स हल आक्रामक रुपमा खुलिरहेका छन् । मल्टिप्लेक्समा चलचित्रले राम्रो व्यापार गर्यो भने लगानी उठाउन धेरै समय कुर्नै पर्दैन ।
तर, कलाकारका लागि भने काठमाण्डौंका दुई हल गोपिकृष्ण मुभिज र अष्टनारायण हल सर्वाधिक प्यारा छन् । गोपिकृष्ण मुभिजका ७ वटै पर्दा दिनभरी नै हाउसफूल रहे भने चलचित्रले निर्मातालाई करिब ४ लाखको शेयर दिन्छ ।
अष्टनारायण हलका ४ वटा पर्दा हाउसफूल रहेभने एक दिनमा करिब ७ हजारभन्दा बढी दर्शकले चलचित्र हेर्न सक्छन् । र, यो हलबाट पनि निर्माताको भागमा उही ४-५ लाख नै शेयर एक दिनमा आउँछ ।साभार;अनलाइन खबर