राप्रपामा वरिष्ठ उपाध्यक्ष बने रवीन्द्र मिश्र
विवेकशील साझा पार्टीबाट राजीनामा दिएपछि राप्रपामा प्रवेश गरे मिश्र
काठमाडौं– विवेकशील साझा पार्टीका निवर्तमान अध्यक्ष रवीन्द्र मिश्र राष्ट्रिय प्रजातन्त्र पार्टीमा प्रवेश गरेका छन् । मिश्र राप्रपाको वरिष्ठ उपाध्यक्ष भएका छन् ।
बुधबार काठमाडौमा आयोजित एकता घोषणा सभामा शंखघन्ट बजाएर वटुकबाट स्वस्तिवाचन गरी एकता घोषणा गरिएको थियो । एकता घोषणा कार्यक्रममा राप्रपा नेताहरुसँगै मिश्रले पृथ्वीनारायण शाहको तस्बिरमा माल्यार्पण गरेका थिए ।१० दिनभित्र पार्टीमा अन्य तहगत एकता गरिने भएको छ । राप्रपा अध्यक्ष राजेन्द्र लिङ्देन र मिश्रले घोषणापत्रमा हस्ताक्षर गरेर एकअर्कालाई बाँडे ।
कार्यक्रममा पार्टी उपाध्यक्ष बुद्धिमान तामाङले मिश्र नेतृत्वको विवेकशील साझा समूहसँगको एकता प्रक्रियाका क्रममा आफूमाथि कतिपयले एकता विरोधी भनेर प्रचार गरे पनि पार्टी एकताकै पक्षमा रहेको प्रस्टीकरण दिए ।
नेता तामाङले राप्रपाको कयौं विभाजनमा पनि आफू एकताको पक्षमा रहेको र अहिले पनि एकताका लागि लागिपरेको बताए । ‘म पार्टी एकता विरोधी होइन । भन्न त कतिपयले एकताका क्रममा एकता विरोधी भनेरसमेत प्रचार गरे । तर म सधंै एकताको पक्षमा रहँदै आएको छु’, तामाङले भने ।
