मनकामना केबुलकार आइतबारदेखि खुला हुने

गोरखास्थित मनकामना मन्दिर आगामी आइतबारदेखि सर्वसाधारणका लागि खुला गरिने भएको छ । कोरोनाका कारण गत चैतदेखि बन्द रहँदै आएको मन्दिर आउँदो २८ मंसिरदेखि खुल्ने भएको हो ।
गत मंगलबार मनकामना मन्दिर क्षेत्र विकास समितिको अगुवाइमा बसेको सरोकारवालाको बैठकले आइतबारबाट मन्दिर र मन्दिरसम्म पुग्ने केबुलकार सञ्चालन गर्ने निर्णय गरेको हो ।
योसँगै सोही दिनदेखि मनकामना केबुलकार सेवासमेत सञ्चालनमा आउनेछ ।
मनकामना मन्दिर र केबुलकार आवश्यक स्वास्थ्य सुरक्षाको मापदण्ड अपनाई सञ्चालन गरिने मन्दिर व्यवस्थापन समितिका कार्यकारी निर्देशक लेवेन्द्र गुरुङले बताए ।
यस्तो मापदण्ड संस्कृति महाशाखाको धार्मिक स्थल सञ्चालनसम्बन्धी स्वास्थ्य सुरक्षा मापदण्ड, २०७७ अनुसार कार्यविधि नै बनाएर सञ्चालन गरिने सीईओ गुरुङको जानकारी दिए । यद्यपि, आइतबारदेखि मन्दिर खुला गरिने भए पनि तत्कालका लागि भक्तजनले मन्दिरभित्र गएर पूजाआजा भने गर्न भने पाउने छैनन् ।
‘मन्दिर खुले पनि अहिलेलाई भक्तजनहरू भित्र गएर पूजाआजा गर्न पाउनुहुन्न, मन्दिर बाहिरैबाट दर्शन गर्ने हो । भक्तजनले ल्याएको फूल, प्रसाद पुजारीले भित्र लगेर चढाइदिने व्यवस्था हुन्छ,’ गुरुङले भने ।