कांग्रेसले बोलायो केन्द्रीय कार्यसमिति बैठक

गोकुल अर्याल

नेपाली कांग्रेसले आगामी १४ औं महाधिवेशन तयारीबारे छलफल गर्न असोज १९ मा पार्टी कार्यालय सानेपामा केन्द्रीय कार्यसमितिबैठक बोलाएको छ ।
बैठकमा केन्द्रीय कार्यसमितिका पदाधिकारी, केन्द्रीय सदस्य तथा आमन्त्रित केन्द्रीय सदस्यलाई अनिवार्य उपस्थिति हुन निर्देशन गरिएको पार्टी कार्यालयका मुख्यसचिव कृष्णप्रसाद पौडेलले जानकारी दिए ।
कोभिड–१९ महामारीका कारण बैठक अगाडि कांग्रेसले पदाधिकारी, सदस्य, आमन्त्रित केन्द्रीय सदस्य र केन्द्रीय कार्यालयमा कार्यरत सम्पूर्ण कर्मचारीको कोरोना परीक्षण गर्ने भएको छ ।
त्यसका लागि १५ असोज बिहान ११ बाट ३ बजेसम्म सम्पूर्ण पदाधिकारी, केन्द्रीय सदस्य, आमन्त्रित केन्द्रीय सदस्य र कर्मचारीहरूलाई अनिवार्य पार्टी केन्द्रीय कार्यालयमा उपस्थित हुन कांग्रेसले आग्रह गरेको छ ।
कोरोना महामारीले फागुन ७ देखि १० का लागि निर्धारित १४ औं महाधिवेशन अन्योल बनेपछि कांग्रेसले केन्द्रीय समिति बैठक बोलाएको हो ।
कोरोना महामारीका बीच वर्तमान कार्यविधिभित्र रहेर निर्धारित मितिमा महाधिवेशन गर्न सम्भव नभएपछि बैठकले छलफलबाट निकास खोज्नेछ ।
कांग्रेसमा पार्टी संयोजन, क्रियाशील सदस्यता वितरण र नवीकरणका कार्यसूचीमै कोरोनाको चुनौती खडा भएको छ । कोरोनाका कारण विभिन्न जिल्लाबाट निर्धारित कार्यसूचीअनुसार काम हुन नसकेको जानकारी यसअघि नै पार्टीको केन्द्रीय कार्यालयमा आइपुगेको छ ।
असोज पहिलो सातासम्म पनि केही जिल्लामा पार्टी संयोजन, क्रियाशील सदस्यता वितरण र नवीकरणको काम सम्पन्न हुन सकेको छैन ।
संक्रमण बढ्दै गएकाले अझै केही साता त्यस प्रकारका राजनीतिक गतिविधि अघि बढाउन सम्भव नहुने र कात्तिक एवं मंसिरको पहिलो सातासम्म दसैंतिहार र छठजस्ता चाडपर्व पर्ने भएकाले निर्धारित कार्यसूचीअनुसार फागुनमा महाधिवेशन हुन नसक्ने देखिएको हो ।
बैठकमा ती सबै विषयलाई ध्यानमा राखेर नयाँ विकल्प अगाडि सारिने कांग्रेस स्रोतले बताएको छ ।