ओस्कार अवार्डका लागि नेपालबाट छानियो ऐना झ्यालको पुतली
नेपालको अन्तर्राष्ट्रिय फिचर फिल्म छनोट समितिले सुजित बिडारी निर्देशित उक्त फिल्मलाई ओस्कार अवार्डमा छनोट गरेको हो।
काठमाडौं– अमेरिकामा आउँदो वर्ष हुने ओस्कार अवार्डको ९५औं संस्करणका लागि नेपाली चलचित्र ऐना झ्यालको पुतली सिफारिसमा परेको छ । नेपालको अन्तर्राष्ट्रिय फिचर फिल्म छनोट समितिले सुजित बिडारी निर्देशित उक्त फिल्मलाई ओस्कार अवार्डमा छनोट गरेको हो ।
नेपालको अन्तर्राष्ट्रिय फिचर फिल्म छनोट समितिले ओस्कारको प्रतिस्पर्धामा सामेल हुन इच्छुक फिल्मकर्मीलाई ३० भदौ २०७९ भित्र फिल्म बुझाउन भनेको थियो। सोही सूचना अनुसार नेपालबाट राउत निर्देशित प्रकाश, सुवर्ण थापा निर्देशित राधा र सुजित बिडारी निर्देशित ‘ऐना झ्यालको पुतली’ले सहभागिताका लागि आवेदन दिएका थिए।
समितिले प्राप्त तीन फिल्ममध्ये सिनेमाको प्राविधिक पक्ष, कथ्यको प्रस्तुति, चरित्रको भावनात्मक विश्लेषण तथा प्रस्तुतिको कलात्मकतालगायत पक्षलाई ख्याल गरी ‘ऐना झ्यालको पुतली’लाई सिफारिस गर्ने निर्णय गरेको विज्ञप्तिमा उल्लेख छ ।
ओस्कार अवार्ड १२ मार्चमा अमेरिकाको लस एन्जलसको डल्बी थिएटरमा हुनेछ ।
