कीर्तिपुरको होल्डिङ सेन्टरमा मध्यरातमा पस्यो बाढी
कीर्तिपुरको होल्डिङ सेन्टरमा बाढी पसेको छ।
गएराति कीर्तिपुर नगरपालिका-१० सुन्दरीघाटस्थित बागमती नदीको वहाब बढेपछि सुकुम्बासी राखेको होल्डिङ सेन्टरमा बाढी पसेको हो।
मध्यराति १ बजे बाढी पसेपछि सुरक्षाकर्मी परिचालन गरी ६३ जना सुकुम्बासीलाई त्यहाँबाट उद्धार गरी त्रिभुवन विश्वविद्यालयको स्मृति भवनमा सारिएको काठमाडौं प्रहरी परिसरका प्रवक्ता एसपी पवन भट्टराईले जानकारी दिए।
‘बाढी पसेपछि गएराति नै त्यहाँ बसेकाहरूलाई सुरक्षित स्थानमा सारेका छौं,’ उनले भने।
उद्धारका लागि सुरक्षाकर्मीले रबरबोट प्रयोग गरेको थियो।
होल्डिङ सेन्टरमा घुँडासम्म आउनेगरी बाढी छिरेपछि त्यहाँ सुकुम्बासीले प्रयोग गर्दै आएका लत्ताकपडा भिजेका छन्।
होल्डिङ सेन्टरमा बाढी पसेपछि सशस्त्र प्रहरी र नेपाल प्रहरीका ६० जनाको संयुक्त टोली खटिएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणले भने १५४ जना मध्ये ५४ जनालाई उद्धार गरिएको जनाएको छ।
बाँकी ६ जना होस्टलमा बसेको र ९४ जना जान नमानेको पनि प्राधिकरणले फेसबुकमा सूचना जारी गरी जानकारी दिएको छ।
शनिबार बिहान उनीहरूलाई खाना, पानी र अन्य आवश्यक खाद्यान्नको व्यवस्थापन कार्य भइरहेको पनि प्राधिकरणले जनाएको छ।
सरकारले बाढीबाट जोगाउन भनेर खोला नदी किनारका सुकुम्बासी वस्ती डोजर चलाएर हटाएको थियो।
