ट्राफिक सचेतना कक्षा अनलाइनबाट
ट्राफिक नियम उल्लङ्घन गरी कारबाहीमा परेका सवारीचालकका लागि सञ्चालित सचेतना कक्षा अबदेखि अनलाइनमार्फत हुने भएको छ । मादक पदार्थ सेवन गरी सवारी चलाउने, रातो बत्ती, लेन अनुशासन उल्लङ्घन तथा तीव्र गतिमा सवारी चलाउनेमाथि ट्राफिक प्रहरीले जरिबाना तथा भौतिक रूपमा कक्षा सञ्चालन गर्दै आएको थियो ।
ट्राफिक प्रहरीले जरिबाना अनलाइन भुक्तानी गरी सचेतना कक्षा पनि अनलाइनमार्फत लिने व्यवस्था सुरु भएपछि ट्राफिक कार्यालय पुगेर घन्टौँ लाम बसी सचेतना कक्षा लिनुपर्ने बाध्यता हटेको छ । प्रहरी प्रधान कार्यालय नक्सालमा आइतबार विशेष समारोहबिच गृहमन्त्री रमेश लेखकले ‘अनलाइन ट्राफिक सचेतना कक्षा’ को आरम्भ गर्नुभयो । सो अवसरमा उहाँले प्रहरी सङ्गठनलाई थप व्यवस्थित, समय अनुकूल तथा प्रविधिमैत्री बनाउनेक्रममा ‘अनलाइन सचेतना कक्षा’ महत्वपूर्ण कदम रहेको बताउनुभयो । प्रहरी सङ्गठनलाई प्रविधियुक्त बनाउन सरकार निरन्तर प्रयासरत रहेको उहाँको भनाइ थियो ।
सीमित स्रोत साधनको प्रयोगमार्फत प्रहरीले असीमित जिम्मेवारी कुशलतापूर्वक निर्वाह गरेकामा प्रशंसा गर्दै गृहमन्त्री लेखकले भन्नुभयो, “गृह मन्त्रालयमा यतिबेला सबैभन्दा बढी माग अस्थायी प्रहरी चौकी स्थापना, अस्थायीलाई स्थायी गर्ने र प्रहरी चौकी स्तरोन्नतिसम्बन्धी छन् । यस्तो कुनै स्थानविशेषमा मात्र नभई देशव्यापी छ । यसले नागरिकको प्रहरीप्रति विश्वास र आस्था बढेको देखाउँछ ।”
उहाँले नेपाल प्रहरीको विधयेकमाथि छलफल भइरहेको र केही दिनपछि प्रतिनिधि सभाको राज्य व्यवस्था समितिमा विधयेकमाथि पुनः छलफल सुरु हुनेसमेत जानकारी दिनुभयो । निजामती वा अन्य सरकारी सेवाभन्दा प्रहरीको कामको प्रकृति फरक र कठिन भएकाले पेन्सन अवधि पुनरवलोकन गरी १६ वर्ष कायम गर्न लागिएको बताउनुभयो । प्रहरी महानिरीक्षक दीपक थापाले प्रहरीले नागरिकको सेवा र सुरक्षालाई थप प्रभावकारी बनाउन डिजिटल प्रणाली विकास तथा प्रविधि उपयोग अपरिहार्य रहेको बताउनुभयो ।
प्रहरी प्रधान कार्यालय र ज्ञान बजार प्रालि नामक संस्थाले संयुक्त रूपमा सञ्चालनमा ल्याएको सो अनलाइन सचेतना कक्षा लागुपदार्थ सेवन गरी सवारी चलाउने तथा गम्भीर प्रकृतिका सवारी नियम उल्लङ्घनका हकमा भने लागु नहुने स्पष्ट पारिएको छ । प्रधान कार्यालय कार्यविभागका प्रमुख प्रहरी अतिरिक्त महानिरीक्षक सिद्धिविक्रम शाह र ज्ञान बजारका कार्यकारी निर्देशक ऋतिकबाबु श्रेष्ठले उक्त अनलाइन सचेतना कक्षालाई समय अनुकूल परिष्कृत गर्दै लगिने बताउनुभयो ।
