आगामी आर्थिक वर्षको बजेट प्रतिनिधिसभाबाट पारित

काठमाडौं–संघीय संसद्ले अर्थमन्त्री वर्षमान पुनद्वारा जेठ १५ मा सार्वजनिक आगामी आर्थिक वर्ष २०८१÷८२ को बजेट बहुमतले पारित गरेको छ।
मंगलबारको प्रतिनिधिसभा बैठकमा अर्थमन्त्री पुनले विनियोजन विधेयक २०८१ लाई पारित गरियोस् भन्ने प्रस्ताव प्रस्तुत गरेका थिए। उपसभामुख इन्दिरा रानाले पुनको प्रस्ताव निर्णयार्थ बैठकमा पेस गरेपछि बजेट बहुमतले पारित गरेको हो। बजेट पारितको प्रस्तावलाई संसद्का बहुमत सांसदले ताली बजाएर सहमति जनाएका हुन्।
बहुमत सांसदहरुको समर्थनसँगै सभामुख देवराज घिमिरेले विनियोजन विधेयक, २०८१ लाई प्रतिनिधिसभाबाट बहुमतले पारित भएको घोषणा गरेका थिए। सरकारले आगामी आर्थिक वर्ष २०८१÷८२ का लागि १८ खर्ब ६० अर्बको बजेट सार्वजनिक गरेको थियो। यसअघि असार ७ मै विधेयक पास गर्ने भनिए पनि संसद् सचिवालयका कर्मचारी आन्दोलित हुँदा बजेट पारितमा विलम्ब भएको हो। आज संसद्बाट विनियोजन विधेयक पारित भएसँगै नयाँ आर्थिक वर्षका बजेट खर्चिने कानुनी बाटो खुलेको छ।