सहकारी छानबिन प्रकरण कार्यदलको बैठकमा जुटेन सहमति

काठमाडौं–सहकारीको रकम अपचलनका सम्बन्धमा छानबिनका लागि गठन गर्न लागिएको संसदीय समितिको विषयमा सहमति जुटाउन आज बसेको बैठकले पनि सहमति जुटाउन सकेन। कार्यदलको बैठकमा प्रमुख प्रतिपक्षी दल नेपाली कांग्रेस तुलनात्मक रुपमा लचक रहे पनि थप छलफल जरुरी रहेको निष्कर्ष निकालिएको एमाले प्रमुख सचेतक महेश बर्तौलाले जानकारी दिए।
उनले भने, ‘विभिन्न विषयमा आज पनि छलफल भयो। उपप्रधान एवं गृहमन्त्री रवि लामिछानेका विषयमा पनि थप छलफल आवश्यक देखियो। आज कांग्रेस साथीहरुले थप लचकता देखाउनुभएको छ।’ विगतमा कांग्रेसले ल्याएको प्रस्तावभन्दा नयाँ प्रस्ताव आएको जानकारी दिँदै उनले बैठक अन्त्य नभएको र केही समयपछि पुनः बस्ने जनाए।
उनले कार्यदलको बैठक नटुंगिएको जानकारी दिँदै आजै पुनः छलफल गरेर सहमति हुने बताए। प्रमुख सचेतक बर्तौलाले सहकारीको रकम अपचलन भएकाको हकमा उल्लेख गर्ने तर व्यक्तिलाई नै दोषी देखाएर जाने कुरा गलत रहेको धारणा राखे।
प्रमुख राजनीतिक दलले गठन गरेको कार्यदलमा सरकारका तर्फबाट कानुन, न्याय तथा संसदीय मामिलामन्त्री पदम गिरी र एमालेबाट प्रमुख सचेतक बर्तौला, कांग्रेसका सह–महामन्त्री एवं सांसद जीवन परियार र राष्ट्रिय स्वतन्त्र पार्टीका सांसद शिशिर खनाल रहेका छन्।