भूकम्पपीडितको अस्थायी आवास निर्माण गर्न एक अर्ब निकासा

काठमाडौं– सरकारले भूकम्प प्रभावितका लागि अस्थायी आवास निर्माण गर्न एक अर्ब रुपैयाँ निकासा गरेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अर्थ मन्त्रालयबाट निकासा भएको सो रकममध्ये ९३ करोड सम्बन्धित जिल्लामा पठाइएको छ ।
प्राधिकरणका प्रमुख कार्यकारी अधिकृत अनिल पोखरेलका अनुसार सोमबार अर्थ मन्त्रालयले एक अर्ब निकासा गरेकामा तत्कालै ९३ करोड रुकम प्रभावित क्षेत्र पठाइएको हो ।
यसअघि कोषमा जम्मा भएको रकम पठाइएकामा अहिले अर्थ मन्त्रालयबाट प्राप्त रकम जिल्लामा पठाइएको पनि उनले बताए ।
उनका अनुसार अर्थबाट निकासा भएको यो रकम पहिलो हो । गत कात्तिक २७ को मन्त्रिपरिषद् निर्णयले १० अर्ब पठाउने निर्णय गरेको थियो । सोहीअन्तर्गत अर्थले एक अर्ब भूकम्प पीडितका लागि निकासा गरेको हो ।
प्राधिकरणका कार्यकारी प्रमुख पोखरेलले निकासा भएको रकम जाजरकोटमा ५४ करोड, रुकुम पश्चिममा ३४ करोड र सल्यानमा पाँच करोड पठाइएको बताए ।
यसअघि प्राधिकरणले अस्थायी आवास निर्माणका लागि एक अर्ब ४१ करोड पठाइसकेको छ ।
पछिल्लो तथ्यांकअनुसार हालसम्म ६० हजार तीन सय ३७ लाभग्राही कायम भएका छन् । १५ हजार सम्झौता भएकामा पहिलो किस्ताबापत चार हजार तीन सय ६४ घर निर्माण भइसकेको छ । घर निर्माण र सम्झौता हुने क्रम दैनिक थपिरहेका जनाइएको छ ।