प्रत्यक्षतर्फ एक तिहाइ महिला उम्मेदवार बनाउन आयोगले दियो निर्देशन
आयोगको निर्देशनअनुसार दलहरूले प्रतिनिधिसभामा प्रत्यक्षतर्फ ५५ र प्रदेशसभामा ११० जना महिलालाई उम्मेदवार बनाउनुपर्नेछ
काठमाडौं– निर्वाचन आयोगले राजनीतिक दलहरुलाई प्रतिनिधिसभा तथा प्रदेशसभा निर्वाचनमा प्रत्यक्षतर्फ उम्मेदवार मनोनयन गर्दा एक तिहाइ महिला प्रतिनिधित्व निश्चित गर्न निर्देशन दिएको छ ।
आयोगले संसदीय समितिको निर्देशनअनुसार राजनीतिक दललाई प्रत्यक्षतर्फ एक तिहाइ महिला उम्मेदवार बनाउन पत्राचार गरेको प्रमुख निर्वाचन आयुक्त दिनेश थपलियाले बताए ।
राष्ट्रिय सभाको राष्ट्रिय सरोकार तथा समन्वय समितिले आयोगलाई यसअघि प्रत्यक्षतर्फ पनि एक तिहाइ महिला उम्मेदवार बनाउने गरी दलहरूलाई निर्देशन दिन पत्राचार गरेको थियो ।
‘संसद्मा समानुपातिकतर्फबाट प्रतिनिधित्व गराउने चलन छ। अब प्रत्यक्षतर्फ पनि एक तिहाइ महिला उम्मेदवार बनाउन आयोगले निर्देशन दिनुप¥यो भनेर संसदीय समितिले निर्देशन दिएको थियो। आयोगले संसदीय समितिको निर्देशन कार्यान्वयन गरेको हो,’ थपलियाले भने ।
आयोगले दलहरूलाई गरेको पत्राचारमा संविधानको धारा ३८ को उपधारा (४), धारा ४२ र धारा ४७ को मर्मबमोजिम प्रत्यक्षतर्फ कम्तीमा एक तिहाइ महिला सुनिश्चित हुने गरी मनोनयन गर्न निर्देशन दिएको हो ।
प्रत्यक्षतर्फ एक तिहाइ महिला सुनिश्चितताका लागि कुनै कानुन नभए पनि संसदीय समितिको निर्देशन आयोगले पालना गरेको थपलियाको भनाइ छ ।
प्रतिनिधिसभामा प्रत्यक्षतर्फ १६५ र प्रदेशसभामा ३३० क्षेत्र छन् । आयोगको निर्देशनअनुसार दलहरूले प्रतिनिधिसभामा प्रत्यक्षतर्फ ५५ जना महिलालाई उम्मेदवार बनाउनुपर्नेछ भने प्रदेशसभामा ११० जना महिलालाई उम्मेदवार बनाउनुपर्नेछ ।







