राप्रपा नेपालले दियो २१ भदौभित्र उम्मेदवार सिफारिस गर्न निर्देशन
प्रत्यक्ष र समानुपातिक उम्मेदवारको नामावली सिफारिस गरेर केन्द्रमा पठाउन जिल्ला समितिलाई निर्देशन दिइएको हो।
काठमाडौं– राष्ट्रिय प्रजातन्त्र पार्टी (नेपाल)ले आउँदो ४ मंसिरमा हुने प्रतिनिधिसभा निर्वाचनका लागि आगामी २१ भदौभित्र उम्मेदवार सिफारिस गर्न निर्देशन दिएको छ ।
अध्यक्ष कमल थापाको अध्यक्षतामा बसेको सचिवालय बैठकले निर्वाचनका लागि उम्मेदवारको नाम पठाउन निर्देशन दिएको हो ।
प्रत्यक्ष र समानुपातिक उम्मेदवारको नामावली सिफारिस गरे केन्द्रमा पठाउन जिल्ला समितिलाई निर्देशन दिइएको महामन्त्री राजाराम बर्तौलाले बताए ।
बैठकले निर्वाचनको पूर्वतयारीका विषयमा पनि निर्णय गरेको छ । महामन्त्री सुशील श्रेष्ठले प्रस्तुत गरेको मेची–महाकाली राष्ट्रिय स्वाभिमान यात्रा कार्यक्रमलाई समेत बैठकले पारित गरेको छ ।
मेचीको काँकडभिट्टाबाट ३० भदौदेखि सुरु हुने मेची–महाकाली राष्ट्रिय स्वाभिमान यात्रा महाकालीको बनवासामा पुगी काठमाडौं आएर समापन हुनेछ ।
यस्तै, विभिन्न समान विचारधारा भएका राजनीतिक दल, समूह तथा व्यक्तिहरुसँग आवश्यक छलफल, परामर्श र वार्ता गर्ने जिम्मेवारी पार्टी उपाध्यक्ष एवं राजनीतिक विभाग प्रमुख दिलनाथ गिरीलाई दिइएको छ ।







