नागरिकता विधेयकमा छलफल गर्न विधायन बैठक बस्दै
बैठकमा राष्ट्रिय सभाले पठाएको नेपाल नागरिकता पहिलो संशोधन विधेयक, २०७९ माथि छलफल हुने कार्यसूची छ ।
काठमाडौं– राष्ट्रिय सभाले फिर्ता पठाएको नेपाल नागरिकता पहिलो संशोधन विधेयक, २०७९ माथि छलफल गर्न सोमबार विधायन व्यवस्थापन समितिको बैठक बस्दै छ ।
बैठकमा राष्ट्रिय सभाले पठाएको नेपाल नागरिकता पहिलो संशोधन विधेयक, २०७९ माथि छलफल हुने कार्यसूची छ ।राष्ट्रिय सभाले नागरिकता विधेयकलाई थप छलफलका लागि पठाएको विधायन व्यवस्थापन समितिमा सत्तापक्षकै बहुमत छ ।
समितिको सभापति ज्येष्ठ सदस्य नारायण दत्त मिश्र छन्। उनी कांग्रेसकै सांसद हुन् ।समितिमा रहेका १५ सांसदमध्ये सत्ता गठबन्धनमा आबद्ध १० सांसद छन् । एमालेबाट ४ र १ जना स्वतन्त्र छन् ।
कांग्रेसबाट जितेन्द्र नारायण देव, नारायण दत्त मिश्र र प्रकाश पन्थ, माओवादी केन्द्रबाट गंगाकुमारी बेल्वासे, तारामान स्वार, राधेश्याम पासवान र सुरेशकुमार आलेमगर, एकीकृत समाजवादीबाट उदयबहादुर बोहरा र वेदुराम भुसाल र जनता समाजवादीबाट प्रमिला कुमारी छन् ।
स्वतन्त्रबाट निर्वाचित खिमलाल देवकोटा पनि गठबन्धन पक्षधर हुन् । यद्यपि देवकोटा यसअघि विधेयकको विपक्षमा थिए । समितिमा एमालेका तर्फबाट देवेन्द्र दाहाल, भगवती न्यौपाने, भैरव सुन्दर श्रेष्ठ र विमला राई पौडेल रहेका छन् ।
समितिले विधेयकलाई फास्ट ट्रयाकमा पारित गरेर संसद्मा लैजाने माओवादी केन्द्रका सांसद सुरेश आलेले बताए ।







