दक्षिण कोरिया रोजगारीमा तोकिएभन्दा ८ हजार बढी नेपालीलाई अवसर
काठमाडौं– रोजगार अनुमति प्रणाली (ईपीएस) मार्फत दक्षिण कोरियामा उत्पादन क्षेत्रतर्फ यसअघि तोकिएभन्दा बढी नेपालीले रोजगारी पाउने भएका छन् ।
एचआरडी कोरियाले उत्पादन क्षेत्रतर्फ यसअघि तोकिएभन्दा ८ हजार बढी नेपालीलाई भाषा परीक्षामा उत्तीर्ण गराइने जनाएको छ ।उत्पादनतर्फको पहिलो र दोस्रो चरणको भाषा परीक्षाबाट उत्तीर्ण हुनेको संख्यामा ८ हजार थप गरी रोस्ट्ररमा सूचीकृत गर्न एचआरडी कोरियाबाट पत्र प्राप्त भएको वैदेशिक रोजगार विभागअन्तर्गतको ईपीएस कोरिया शाखाले बताएको छ।
यसअघि उत्पादन क्षेत्रतर्फ पहिलो चरणको परीक्षाबाट ३,१३० र दोस्रो चरणको परीक्षाबाट ३,७८३ गरी ६,९१३ जनालाई उत्तीर्ण गराइने जनाएको थियो ।
उत्पादनतर्फको परीक्षामा उत्तीर्णको संख्या थपिएसँगै पहिलो चरणको परीक्षाबाट ६,७५२ र दोस्रो चरणबाट ८,१६१ गरी १४,९१३ जना उत्तीर्ण हुनेछन्। यस पटक उत्पादनतर्फ ३३ हजार ९०० र कृषितर्फ ९ हजारले फाराम भरेका थिए ।उत्पादनतर्फको पहिलो चरणको परीक्षा गत २ साउनदेखि सुरु भएको थियो । दोस्रो चरणको परीक्षा २ भदौदेखि चलिरहेको छ । पहिलो चरणको परीक्षाको नतिजा १७ भदौमा प्रकाशित हुने ईपीएस कोरिया शाखाले जनाएको छ ।
शाखाका निर्देशक पुष्पराज कटुवालले परीक्षामा उत्तीर्ण हुनेको संख्या बढ्ने भएसँगै रोजगारीका लागि कोरिया जाने युवाको संख्या पनि वृद्धि हुने बताए।‘यो नेपाली युवाका लागि अवसर हो,’ उनले भने, ‘कोरिया सरकारले नेपालीलाई रुचाएको देखिएको छ।’
सन् २००८ देखि ईपीएसमार्फत नेपाली युवा रोजगारीका लागि दक्षिण कोरिया गइरहेका छन् । ईपीएसबाट हालसम्म ७३ हजार नेपाली कोरिया पुगिसकेका छन् । उनीहरूले चार वर्ष १० महिना कोरियामा काम गर्न पाउँछन् । हाल कोरियामा ३३ हजार ईपीएस श्रमिक छन् ।दक्षिण कोरियाले ईपीएस प्रणालीमार्फत विभिन्न १६ देशबाट श्रमिक लैजाँदै आएको छ । ईपीएसबाट श्रमिक लैजाने मुलुकको सूचीमा नेपाल दोस्रो स्थानमा छ । सबैभन्दा बढी कम्बोडियाबाट श्रमिक कोरिया पुगेका छन् ।







