कांग्रेस सभापति देउवालाई भेटेर माधव नेपालले मागे सहयोग

काठमाडौं– सुदूरपश्चिम सरकारको भाग पाए पनि एमालेले सहमति नदिएपछि सहयोग खोज्न नेकपा एसका अध्यक्ष माधवकुमार नेपालले कांग्रेस सभापति शेरबहादुर देउवासँग आग्रह गरेका छन्। कांग्रेस केन्द्रीय सदस्य नारायण खड्काको निवास गल्फुटारमा भएको भेटमा नेता नेपालले सुदूरपश्चिम सरकारमा नेकपा एसबाट अगाडि सारिएका आफ्ना मुख्यमन्त्री उम्मेदवारलाई समर्थन गर्न आग्रह गरेको बुझिएको छ। दुई नेताबीच सुदूरपश्चिम प्रदेशमा सरकार गठनमा देखिएको समस्याबारे कुराकानी भएको छ। यस्तै, कोसी प्रदेशमा देखिएको समस्या र वैकल्पिक समीकरणका विषयमा पनि कुराकानी भएको बताइन्छ।
यसअघि फागुन २१ म नयाँ गठबन्धन बनेको भोलिपल्ट माधव नेपाललाई भेट्न देउवा उनको निवासमै गएका थिए। बिरामी भएर स्वास्थ्यलाभ गरिरहेका नेपालसँग त्यतिबेला कांग्रेसहितको नयाँ समीकरण बनाउन देउवाले आग्रह गरेका थिए। सुदूरपश्चिम प्रदेशमा एकीकृत समाजवादी संसदीय दलका नेता दीर्घ सोडारीले मुख्यमन्त्रीमा दाबी प्रस्तुत गर्दैछन्। तर, एमालेले उनलाई समर्थन गरिसकेको छैन। एमाले, माओवादी केन्द्रले नागरिक उन्मुक्ति पार्टीकै कैलाश चौधरीलाई मुख्यमन्त्रीका रूपमा समर्थन गर्दै दाबी पेस गरेका थिए।
प्रदेश प्रमुख नजिर मियाँले दुवै दाबी खारेज गरी नयाँ सरकार गठनका लागि गरेको आह्वानको समयसीमा पनि आज साँझ सकिँदै छ।