चित्रकलामार्फत काठमाडौंमा चिनाइँदै खोटाङ
काठमाडौं। काभ्रेकी रोजिना तामाङ खोटाङ पुग्न पाएकी छैनन्। तर, उनले सोमबारदेखि बबरमहलस्थित नेपाल कला परिषद्मा सञ्चालित चित्रकलामार्फत खोटाङबारे नजिकबाट नियाल्न मौका पाइन्।काठमाडौंको एक विद्यालयमा कक्षा–१२ मा अध्ययनरत तामाङ ‘मुन्दुम अन्तर्राष्ट्रिय चित्रकला प्रदर्शनी’मार्फत राखिएका खोटाङका धार्मिक, ऐतिहासिक तथा पर्यटकीय स्थलबारे जानकारी लिइन्। दिक्तेल रुपाकोट मझुवागढी नगरपालिकाले फागुन ५ देखि आयोजना गरेको प्रदर्शनीमा आएकी रोजिनाले भनिन्, ‘मुन्दुम अन्तर्राष्ट्रिय चित्रकला प्रदर्शनीमा राखिएका क्यानभास चित्रहरु काठमाडौँमै बसेर अवलोकन गर्न पाउँदा सिंगो खोटाङ कस्तो रहेछ भन्ने थोरै भए पनि जानकारी लिन पाइयो। चित्रकला हेरेपछि खोटाङ मेरो घुम्नैपर्ने सूचीमा परेको छ। त्यहाँ पुगेर धार्मिक, ऐतिहासिक तथा पर्यटकीय स्थल घुम्नेछु।’
काठमाडौंको एक क्याम्पसमा बीबीए पढ्दै गरेकी अर्घाखाँचीकी कुसुम श्रेष्ठ पनि सोही चित्रकला प्रदर्शनीमै भेटिइन्। ‘चित्रकला प्रदर्शनीमा सिंगो खोटाङको रुप झल्किएको पाएँ। अर्घाखाँचीको मान्छेलाई काठमाडौंमै बसेर खोटाङको धर्म, संस्कार, संस्कृति र परम्पराबारेमा चित्रकलामार्फत जानकारी लिने अवसर मिल्यो।’भक्तपुर बस्ने धनगढीका गणेश कडाल पनि श्रीमती र बच्चासहित चित्रकलाप अवलोकनका लागि आएका थिए। चित्रकलाको प्रसंशा गर्दै यसबाट खोटाङको सस्कृति र परम्परा बुझाउने प्रयास गरिएको बताए।राष्ट्रपति रामचन्द्र पौडेलले क्यानभासमा चित्र कोरेर उद्घाटन गरेको मुन्दुम अन्तर्राष्ट्रिय चित्रकला प्रदर्शनी कार्यक्रममा रोजिना, कुसुम र गणेशजस्तै दैनिक करिब पाँच सयले चित्रकला अवलोकन गर्दै आएका छन्।
दिक्तेलको धार्मिक तथा ऐतिहासिकस्थल मझुवागढी, भवनगैरा, हाटडाँडा, शंखधर शाख्वाचोक, शुभम् फाउन्डेसन र जालपा पुगेर ख्यातिप्राप्त चित्रकारले प्रत्यक्ष रुपमा उतारेका क्यानभास चित्रलाई प्रदर्शनीमा राखिएको छ। दिक्तेलमा गत असोज १७ देखि २१ सम्मा आयोजना गरिएको ‘चित्रकला कार्यशाला तथा प्रदर्शनी’मा सहभागी नेपालसहित अष्ट्रेलिया, बङ्गलादेश, भुटान, चीन, जापान, इजिप्ट, भारत, लातभिया, लिथुआनिया, दक्षिण कोरिया, अमेरिका, युक्रेन र भियतनामका चित्रकारसहित विभिन्न ५० देशका ख्यातिप्राप्त चित्रकारले क्यानभासमा उतारेका दुई सय १० वटा चित्रलाई संकलन गरेर प्रदर्शनीमा राखिएको आयोजकले जनाएको छ। देश तथा विदेशमा समेत ख्यातिप्राप्त चित्रकारले खोटाङका धार्मिक तथा पर्यटकीय स्थल त्रिधार्मिक स्थल हलेसी, जन्तेढुंगा, भुलभुले दूधकुण्डलगायतका ठाउँको क्यानभास चित्र उतारेका छन्। दिक्तेल रुपाकोट मझुवागढी नगरपालिकाले मुन्दुम अन्तर्राष्ट्रिय चित्रकला प्रदर्शनी कार्यक्रम आयोजना गरेर इतिहास निर्माण गरेको चित्रकार के के कर्माचार्यले बताए।
चित्रकार कर्माचार्यको अमूर्त क्यानभास चित्रहरुसमेत प्रदर्शनीमा राखिएका छन्। अमेरिकाकी चित्रकार एवम् प्रोफेसर जोय वल्फ, लातभियाकी चित्रकार आन्दा पैकाने, नेपाली चित्रकार रतनकुमार राई, विजय थापालगायत ५० देशका चित्रकारले क्यानभासमा उतारेर प्रदर्शनीमा राखिएका चित्रलाई खोटाङमै बोलाएर जिल्लाका दसवटै स्थानीय तहका धार्मिक, ऐतिहासिक एवं पर्यटकीय स्थल तथा धर्म, संस्कार, संस्कृति, परम्परा र रहनसहनलाई क्यानभासमा उतार्न लगाइएको थियो।
