सुन तस्करी जाँचबुझ आयोगले थाल्यो काम
आयोग अध्यक्ष डिल्लीराज आचार्यले आज सिंहदरबारमा पत्रकार सम्मेलन गरेर सुन तस्करीको जाँचबुझ थालिएको बताएका हुन् ।
काठमाडौं– हालसम्म भएका अवैध सुन तस्करीबारे छानबिन गर्न सरकारले गठन गरेको सुनको अवैध पैठारी (तस्करी) नियन्त्रणसम्बन्धी जाँचबुझ आयोग २०८० ले आजदेखि औपचारिक रुपमा काम थालेको छ।
आयोग अध्यक्ष डिल्लीराज आचार्यले आज सिंहदरबारमा पत्रकार सम्मेलन गरेर सुन तस्करीको जाँचबुझ थालिएको बताएका हुन् ।
जाँचबुझ आयोगको आजको पहिलो बैठकले साइनबोर्ड राख्ने, सोही नाममा लेटरप्याड तयार गर्ने, इमेल कायम गर्ने र वेबसाइट तयार गर्नेलगायत ५ निर्णय गरेको अध्यक्ष आचार्यको भनाइ छ।
सरकारले गत १४ असोजमा सुन तस्करी प्रकरण छानबिनका लागि उच्च अदालतका पूर्वन्यायाधीश आचार्य संयोजकत्वमा चार सदस्यीय समिति गठन गरेको थियो।आयोग सदस्यमा अर्थ मन्त्रालयका किशोरजंग कार्की, गृह मन्त्रालयका प्रेमराज जोशी र पूर्वएआईजी सहकुल थापा रहेका छन्।जाँचबुझ समितिले सुन तस्करी नियन्त्रणको सुझावसहितको प्रतिवेदन सरकारलाई बुझाउनेछ।
सरकारले आयोगलाई तीन महिनाभित्र अनुसन्धान सम्पन्न गरेर सुनको अवैध पैठारी तस्करीको नियन्त्रणका लागि सुझावसहितको प्रतिवेदन पेस गर्न निर्देशन दिएको छ। गत ३ साउनमा राजस्व अनुसन्धान विभागले त्रिभुवन अन्तर्राष्ट्रिय विमानस्थल भन्सार कार्यालयबाट बाहिरएको ठूलो परिमाणको सुन बरामद गरेको थियो। ‘ब्रेक सु’भित्र लुकाएर ल्याइएको उक्त सुन गालेर जोख्दा ६० किलो सात सय १६ ग्राम पाइएको थियो।
राजस्व अनुसन्धान विभागले नियन्त्रणमा लिएको उक्त सुन प्रकरणको प्रारम्भमा विभाग र पछि सरकारको निर्देशनपछि नेपाल प्रहरीको केन्द्रीय अनुसन्धान ब्युरो (सीआईबी)ले अनुसन्धान गरेको थियो। सीआईबीले अनुसन्धानका क्रममा सुन तस्करीमा संलग्न देखिएका व्यक्तिविरुद्ध अदातलमा मुद्दा दायर गरेको छ।
सुन तस्करी प्रकरणमाा प्रमुख प्रतिपक्षी एमालेलगायतका दलले उच्चस्तरीय छानबिन आयोगको माग गर्दै लामो समय संसद् अवरुद्ध गरेका थिए। गत ६ भदौमा सरकार र राष्ट्रिय मान्यता प्राप्त राजनीतिक दलबीच ५ असोजसम्म उच्चस्तरीय छानबिन आयोग गठन गर्ने र सोही दिनदेखि आयोगले काम गर्ने सहमति भएको थियो।
दलहरुबीच सहमति हुन नसक्दा आयोग गठनमा ढिलाइ भएको थियो। प्रधानमन्त्री पुष्पकमल दाहाल ‘प्रचण्ड’ संयुक्त राष्ट्रसंघको ७८औं महासभामा सहभागितासँगै चीन भ्रमण सम्पन्न गरेर स्वदेश फर्केपछि सरकारले जाँचबुझ आयोग गठन गरेको हो।







