बुधबार राजनीतिक दल र स्वतन्त्रलाई चुनाव चिह्न दिँदै आयोग
अन्तिम नामावलीमा समावेश भएका प्रत्येक उम्मेदवारलाई त्यस्तो दलका लागि निर्धारण गरिएको चिन्ह निर्वाचन अधिकृतले प्रदान गर्ने
काठमाडौं– निर्वाचन आयोगले आगामी ४ मंसिरमा हुने प्रतिनिधिसभा तथा प्रदेशसभा निर्वाचनका लागि बुधबार दल÷स्वतन्त्र उम्मेदवारलाई चुनाव चिह्न वितरण गर्ने भएको छ ।निर्वाचन आयोगका अनुसार आइतबार उम्मेदवारी दिएका प्रतिनिधिले आज बिहान १० बजेदेखि १ बजेसम्म उम्मेदवारी फिर्ता लिन सक्नेछन् भने ३ बजेसम्म उम्मेदवारको अन्तिम नामावली प्रकाशन हुनेछ ।
त्यसपछि दल तथा स्वतन्त्र उम्मेदवारलाई चुनाव चिन्ह प्रदान गरिने आयोगले जनाएको छ ।उम्मेदवारको अन्तिम नामावलीमा समावेश भएका प्रत्येक उम्मेदवारलाई त्यस्तो दलका लागि निर्धारण गरिएको चिन्ह निर्वाचन अधिकृतले प्रदान गर्नेछन् ।
त्यस्तै, आयोगले कुनै उम्मेदवारलाई निर्वाचन चिन्ह प्रदान गरी सकेपछि त्यस्तो उम्मेदवारले आफ्नो दल त्याग गरे वा अर्को दलमा प्रवेश गरे निजलाई प्रदान गरिएको निर्वाचन चिन्ह परिवर्तन हुने छैन ।त्यस्तो उम्मेदवार निर्वाचित भए सम्बन्धित दलले प्रमाणसहित आयोगमा उजुरी दिएमा निजको सदस्यता खारेज हुनेछ । कुनै दलले निर्वाचनमा उम्मेदवार मनोनित नगरेको अवस्थामा समेत सो दललाई प्रदान गरिएको निर्वाचन चिन्ह अन्य उम्मेदवारलाई प्रदान गरिने छैन ।
निर्वाचन अधिकृतले स्वतन्त्र उम्मेदवारलाई निर्वाचन चिन्ह प्रदान गर्दा स्वतन्त्र उम्मेदवारले प्रयोग गर्ने गरी निर्धारण गरेका निर्वाचन चिन्हको समूहबाट चिन्ह प्रदान गर्नुपर्नेछ । निर्वाचन चिन्ह प्रदान गर्दा निर्वाचन अधिकृतले त्यस्तो उम्मेदवार वा निजको प्रतिनिधिलाई निर्वाचन चिन्ह रोज्न लगाई निजहरूको रोहवरमा निर्वाचन चिन्ह प्रदान गर्नुपर्नेछ।
तर निर्वाचन चिन्ह प्रदान गर्दा कुनै उम्मेदवार वा निजको प्रतिनिधि उपस्थित नभए उपस्थित उम्मेदवार वा निजको प्रतिनिधिले रोजेर बाँकी रहेको निर्वाचन चिन्हबाट निर्वाचन अधिकृतले निर्वाचन चिन्ह प्रदान गर्ने व्यवस्था छ ।
निर्वाचन चिन्ह रोज्न लगाउँदा एकभन्दा बढी उम्मेदवारले एउटै निर्वाचन चिन्ह रोजे त्यस्तो उम्मेदवारको नामको नेपाली वर्णानुक्रमको आधारमा प्राथमिकता दिई निर्वाचन चिन्ह प्रदान गर्नुपर्नेछ । उम्मेदवारलाई निर्वाचन चिन्ह प्रदान गरिसकेपछि निर्वाचन अधिकृतले एकीकृत निर्वाचन व्यवस्थापन सूचना प्रणालीमा प्रविष्ट गर्नेछन् ।







