बालुवाटार गठबन्धन भेलामा सिट बाँडफाँटबारे छलफल हुँदै
काठमाडौं–प्रधानमन्त्री निवास बालुवाटारमा सत्तारुढ पाँच दलीय गठबन्धनको बैठक सुरु भएको छ । सत्ता गठबन्धनमा आबद्ध शीर्ष नेताहरू बालुवाटार बैठकमा जुटेका हुन् ।बैठकमा सिट बाँडफाँटका विषयमा छलफल हुने बताइएको छ।
यसअघि बुधबार दिउँसो सिट बाँडफाँट कार्यदलको बैठक बसेको थियो । सिट बाँडफाँट कार्यदलका संयोजक एवं कांग्रेस नेता कृष्णप्रसाद सिटौलाले बैठकका क्रममा नेताहरुसँग भेट्न बाँकी रहेको बताएका थिए ।
सिट संख्याको मोडालिटी र दलहरूको जनमतबारे बैठकमा कुरा भए पनि निर्णय पुग्न पाँचै दलका शीर्ष नेतासँग बस्नुपर्ने निष्कर्ष निकालेको कार्यदलका एक सदस्यले जानकारी दिए ।‘हिजोको बैठकमा संयोजकले पार्टीका शीर्ष नेता भेट्न बाँकी रहेको सुनाउनुभयो,’ ती सदस्यले भने, ‘होमवर्क पूरा नभएको भनेर कसैबाट ठोस प्रस्ताव पेस भएन ।’
पाँच दलले विभिन्न आधारमा सिट बाँडफाँट गर्ने प्रस्ताव गरेका छन् । स्थानीय तहको निर्वाचन, २०७४ मा पाएको सिट संख्याको आधारलगायत प्रस्ताव भएका छन् ।







