आचार्यको जुम्ली शब्दकोष प्रकाशोन्मुख अवस्थामा
जुम्ला, १८ माघ । कर्णालीकै ज्येष्ठ पत्रकार तथा खसिया आखर ‘जुम्ली शब्दकोष’ का सम्पादक रमानन्द आचार्यद्वारा लिखित जुम्ली शब्दकोष प्रकाशोन्मुख रहेको छ ।
विसं २०६५ मा खसिया आखर जुम्ला नामक संस्थाको स्थापना गरी जुम्ली शब्दकोष निर्माणका लागि शब्द सङ्कलनमा आठ वर्ष निरन्तर लाग्नुभएका सम्पादक आचार्यले हालसम्म १५ हजार शब्द सङ्कलन गरेको बताउनुभयो ।
सङ्कलित शब्दमध्ये ‘अ’ देखि ‘न’ वर्णसम्मका सबै शब्द कम्प्युटरकृत गरिसकेको र बाँकी ‘प’ देखि ‘ज्ञ’ सम्मका वर्णबाट आउने शब्द चार महिनाभित्र सक्ने लक्ष्य राखेको छु, उहाँले भन्नुभयो । उमेर ७३ नाघिसकेको बताउँदै उहाँले आफूले थालेको काम आफैँले सबैको माझ बेलैमा पस्केर जाने प्रतिबद्धता गर्नुभयो ।
कर्णाली भाषाको उद्गम थलो भएको र त्यसको राजधानी जुम्ला सिंजाको वास्तविक परिचय दिनलाई ‘जुम्ली शब्दकोष’ नाम राखेको बताउने आचार्यले शब्द सङ्कलन सबैभन्दा बढी हुम्ला जिल्लाबाट भएको जनाउनुभयो ।
त्यसैगरी, अछाम, बाजुरा, जाजरकोट, कालीकोट, मुगु र डोल्पाबाट शब्द सङ्कलन गरिएको उहाँले अवगत गराउनुभयो । शब्द सङ्कलनका लागि हुम्लाबाट चक्रबहादुर शाही, तारा शाही, गोर्खबहादुर बोगटी, बलबहादुर ऐडी, जुम्लाका तुङ्गानाथ उपाध्याय, दयादत्त हमाल, प्रकाशचन्द्र खत्री र हरिबाबु चौलागाईंले सहयोग पु¥याएको उहाँको भनाई थियो ।
उहाँले सुरुमा पाण्डुलिपि तयार गरी विषय विज्ञसम्म पु¥याउने र उहाँहरुबाट आएका सुझाव बमोजिम संशोधनसहितको परिमार्जित, परिस्कृत दोस्रो संस्करण प्रकाशन गर्ने जमर्को राख्नुभएको छ ।
सात सदस्यीय सम्पादन मण्डल गठन भएपनि काम एक्लैले गर्नुपरेका कारण झन्डै आठ वर्ष शब्दकोष तयार गर्न लागेको उहाँले बताउनुभयो । उहाँका अनुसार शब्दकोषले कर्णालीको सामाजिक, सांस्कृतिक, ऐतिहासिक र धार्मिक संस्कार र संस्कृति झल्काउँछ र यो सौरसेनी भाषा परिवारभित्र पर्दछ ।
आचार्यले शब्दकोष प्रकाशनका लागि जिविससंग रु १२ लाखको प्रस्ताव गर्नुभएको थियो । स्थानीय विकास अधिकारी हरिनारायण बेल्वासेले शब्दकोष प्रकाशनका लागि जतिसक्दो आवश्यक रकम जिल्ला विकास समिति जुम्लाले व्यहोर्ने बताउनुभयो ।
जीवनको उत्तरार्धमा नयाँ पुस्तालाई महत्वपूर्ण कोसेली छोड्न अहोरात्र खटिएर काम गरेको भन्दै स्थानीय विकास अधिकारी बेल्वासेले सम्पादक आचार्यलाई धन्यवाद ज्ञापन गर्नुभएको थियो । रासस
