राप्रपा एकता मंसिर ६ गते
•लक्ष्य हिन्दू राष्ट्र नेपाल निर्माण •माघभित्र महाधिवेशन गर्नेकार्तिक ३०, २०७३- पटक पटक तयारी भएर भाँडिएको दुई राप्रपा एकीकरण मंसिर ६ गते गर्ने टुंगो लागेको छ।
राष्ट्रिय प्रजातन्त्र पार्टी (राप्रपा), नेपालका अध्यक्ष कमल थापा र राष्ट्रिय प्रजातन्त्र पार्टी (राप्रपा)का अध्यक्ष पशुपति शमसेर जबराबीच पार्टी एकीकरणसम्बन्धी सम्झौतापत्रमा मंगलबार बिहान हस्ताक्षर भएको छ ।
पार्टी एकताको घोषणा मंसिर ६ गते गर्ने सम्झौतापत्रमा उल्लेख छ । एकीकृत पार्टीको महाधिवेशन आगामी माघभित्र सम्पन्न गर्ने तय भएको छ ।
संयुक्त बैठकले दुवै पार्टीद्वारा गठित वार्ता टोलीले पेस गरेको राप्रपा नेपाल र राप्रपाबीचको एकीकरणसम्बन्धि नीति तथा अवधारणालाई अनुमोदन गरेको छ । बैठकले महाधिवेशन नभएसम्मका लागि अन्तरिम विधान पनि अनुमोदन गरेको छ ।
पार्टी एकतापछि पार्टीको नाम राष्ट्रिय प्रजातन्त्र पार्टी (राप्रपा) रहनेछ भने पार्टी अध्यक्ष तथा संसदीय दलका नेता कमल थापा र राष्ट्रिय अध्यक्ष पशुपति शमसेर जबरा हुनेछन् ।
पुष्पकमल दाहाल सरकार बन्नुअघि नै राप्रपा एकताको तयारी भए पनि अन्तिम समयमा भाँडिएको थियो । एकता नभएपछि राप्रपा दुई मन्त्रीसहित सरकारमा गएको थियो भने राप्रपा नेपाल विपक्षमा बसेको छ ।
संसदमा राप्रपा नेपालका २५ र राप्रपाका १३ सांसद छन् ।आजको कान्तिपुरमा खबर छ ।
