कृषि बिमालेख बिक्री नरोक्न प्राधिकरणको निर्देशन

काठमाडौं– नेपाल बिमा प्राधिकरणले कृषि बिमालेख बिक्री नरोक्न बिमा कम्पनीलाई निर्देशन दिएको छ। नेपाल बिमक संघबाट जारी विज्ञप्तिले भ्रम सिर्जना गराउनेतर्फ सचेत रहन आग्रह गर्दै प्राधिकरणले कृषि बिमालेख नरोक्न निर्देशन दिएको हो। बिमा कम्पनीले कृषि बिमामा अनुदानबापतको रकम सरकारबाट नआएको बताउँदै बिमालेख बिक्री नगर्ने सूचना बिमक संघले जारी गरेको थियो। संघले बुधबार पनि सोही आशयको धारणा विज्ञप्तिमार्फत सार्वजनिक गरेको छ।
‘नेपाल बिमक संघबाट २०८१ वैशाख १२ मा जारी कृषि बिमासम्बन्धी विज्ञप्तिबारे गम्भीर ध्यानाकर्षण भएको छ। कृषि तथा पशुपक्षी बिमा व्यवसायलाई भरपर्दो र विश्वसनीय बनाउने तथा सरकारबाट प्राप्त हुन बाँकी अनुदान रकम यथाशीघ्र उपलब्ध गराउने विषयमा कृषि तथा पशुपक्षी विकास मन्त्रालयसँग बारम्बार समन्वय तथा पहल भइरहेको छ,’ प्राधिकरणको विज्ञप्तिमा भनिएको छ। छिट्टै रकम प्राप्त हुने हुँदा तत्काल उक्त विज्ञप्ति फिर्ता लिई कृषि तथा पशुपक्षी बिमा व्यवसाय तथा दाबी भुक्तानी सुरु गर्न प्राधिकरणले निर्देशन दिएको छ।