प्रधानमन्त्री प्रचण्डले गरे नागढुंगा सुरुङमार्गको ‘ब्रेक थ्रु’, एक वर्षपछि सञ्चालनमा आउने
काठमाडौं– नेपाललाई सुरुङ युगमा लैजाने महत्त्वपूर्ण आयोजनाका रुपमा रहेको नागढुंगा सुरुङमार्ग छिचोलिएको ९ब्रेक थ्रु० छ।
प्रधानमन्त्री पुष्पकमल दाहाल ‘प्रचण्ड’ ले आज सुरुङ छिचोल्ने स्वीच थिचेका हुन्। प्रधानमन्त्रीले स्वीच थिचेपछि धादिङ र काठमाडौं दुवैतर्फबाट खनिएको सुरुङ एकआपसमा छिचोलिएको हो।
धादिङको सिस्नेखोला र काठमाडौंको चन्द्रागिरि नगरपालिका–१ मा रहेको टोटीपाखामा सुरुङ जोडिएको छ। कार्यक्रममा उपप्रधानमन्त्री एवं भौतिक पूर्वाधार तथा यातायातमन्त्री रघुवीर महासेठलगायतका उच्च अधिकारी उपस्थित थिए। यस्तै, संघीय सांसद एवं प्रदेश सांसदहरुको उपस्थिति थियो।
नागढुंगाको घुमाउरो सडक र जामबाट आजित भएका नागरिकलाई उक्त सुरुङमार्ग निर्माण भएपछि थप सहज हुनेछ। आज छिचोलिएको सुरुङ मार्गमा एक वर्षपछि नियमित रुपमा सवारी आवागमन हुने सम्बद्ध आयोजनाले जनाएको छ। नागढुंगा सुरुङ निर्माण परियोजनाका उपनिर्देशक गोविन्द दुमरका अनुसार एक विशेष समारोहबीच सुरुङको ‘ब्रेक थ्रु’ गरिएको हो। यो सुरुङमार्गको कुल लम्बाइ दुई हजार ६ सय ८८ मिटर छ। यसअघि नै आपतकालीन रुपमा प्रयोग गरिने सुरुङ भने गत साउनमै ब्रेक थ्रु भइसकेको छ।
सुरुङभित्रको सडक ढलान, बत्ती जडान, अक्सिजन पाइप जडानलगायतका कामका लागि केही समय लाग्नेछ। आयोजनाको कुल लागत झन्डै २२ अर्ब बराबर छ। जापानी निर्माण कम्पनी हाज्मा एन्डो कर्पोरेसनले सुरुङमार्ग निर्माणको जिम्मा पाएको छ।