चौतर्फी विरोधपछि संसद् भवन पसेका लघुवित्त पीडितहरू रिहा
चौतर्फी विरोधपछि संसद् भवन पसेका लघुवित्त पीडितहरू रिहा फोटो काठमाडौं– सरकारको चौतर्फी विरोधपछि सोमबार नयाँ बानेश्वरस्थित संघीय संसद् भवनमा प्रवेश गरेका लघुवित्त पीडितलाई प्रहरीले छाडेको छ। प्रहरीले संसद् बैठक चलिरहेका बेला पक्राउ परेका लघुवित्त पीडितलाई हाजिरी जमानीमा छाडेको हो। लघुवित्त पीडितहरु सोमबार बानेश्वरमा बैठक चलिरहेका बेला सरकारलाई माग पूरा गर्नका लागि दबाब दिन आफ्ना माग पूरा गर्न संसद् भवन पसेका थिए। त्यसपछि प्रहरीले उनीहरूलाई प्रहरीले पक्राउ गरेर थुना पठाएको थियो। प्रहरीले लघुवित्त पीडित संसद् भवन कसरी पसे भन्नेबारे सोधीखोजी गर्न उपत्यका प्रहरी कार्यालय रानीपोखरीका एसएसपी दिनेश मैनाली नेतृत्वको समिति बनाएको थियो । समितिमा काठमाडौं प्रहरीका एसपी नवराज अधिकारी र उपत्यका प्रहरी कार्यालयकै डीएसपी दिनेश घिमिरे सदस्य छन्। सरकारले सर्वसाधारणलाई सडकपेटीमा समेत हिँडडुल गर्न नदिन सोमबारदेखि नै सिंहदरबार, संसद् भवनलगायत क्षेत्र वरपर काँडेतार लगाएर बाटो बन्द गरेको थियो। सरकारको उक्त रबैयाप्रति सर्वसाधारण तथा नागरिक समाजबाट विरोध भएपछि आजदेखि काँडेतार पनि हटाइएका छन्।