जनै पूर्णिमा अवसरमा सार्वजनिक बिदा
काठमाडौ– सरकारले जनै पूर्णिमा अवसरमा बिहीबार सार्वजनिक बिदा दिने भएको छ । हिन्दु धर्मावलम्बीको पर्व जनै पूर्णिमा अवसरमा भदौ १४ गते बिहीबार सरकारले सार्वजनिक बिदा दिने भएको हो ।
गृह मन्त्रालयले पर्व बिदाअन्र्तगत भदौ १४ गते रक्षा बन्धन तथा जनै पूर्णिमाको दिन सार्वजनिक बिदा दिने निर्णय गरेको हो।
भाइ र बहिनीबीचको अटुट प्रेमलाई दर्शाउने पर्व हो, रक्षाबन्धन। रक्षाबन्धन शब्दमा दुई वटा शब्द जोडिएको छ, ‘रक्षा र बन्धन’। रक्षाको अर्थ भाइले बहिनीको रक्षा गर्ने वाचा दिन्छ भने बन्धन, जसले भाइबहिनीको सम्बन्धमा अझ बढी माया, स्नेह, सामिप्य र प्रेम ल्याउँछ।
शास्त्रीय मान्यताअनुसार तागाधारी (ब्राह्मण, क्षेत्री, वैश्य) ले वर्ष दिन वेद पढ्नुपर्ने र त्यसको सांगे (समाप्ति) को दिनका रुपमा जनै पूर्णिमालाई लिइन्छ। यस दिन स्नान गरी सप्तऋषिसहित ब्रह्मा, विष्णु र महेश्वरको पूजा गरी जनै मन्तरेर त्यसलाई धारण गर्ने प्रचलन छ।
