सुन मूल्यमा नयाँ रेकर्ड, एकै दिन १८०० ले बढ्यो

काठमाडौं– नेपाली बजारमा दुई दिनमै सुनको मूल्यले रेकर्ड ब्रेक गरेको छ। अघिल्लो दिन बुधबारको तुलनामा सुन मूल्य बिहीबार तोलामै १८०० रुपैयाँले बढेको नेपाल सुनचाँदी व्यवसायी महासंघले जनाएको छ। आज छापावाल सुनको मूल्य प्रतितोला १८०० ले बढेर १ लाख ४४ हजार रुपैयाँमा कारोबार भइरहेको छ। यसैगरी तेजाबी सुनको मूल्य तोलाको १ लाख ४३ हजार ३०० रुपैयाँमा कारोबार भइरहेको महासंघले जनाएको छ।
यसअघि जेठ २२ मा सुनको मूल्यले नयाँ रेकर्ड कायम गरेको थियो। उक्त दिन छापावाल सुन प्रतितोला १ लाख ४२ हजार ७०० रुपैयाँमा कारोबार भएको थियो भने तेजाबी सुनको मूल्य प्रतितोला १ लाख ४२ हजार रुपैयाँ निर्धारण भएको थियो। बुधबार प्रतितोला १ लाख ४२ हजार २ सय रुपैयाँ रहेको सुन बिहीबार १ लाख ४४ हजार रुपैयाँ पुगेको हो। बिहीबार चाँदीको मूल्य पनि प्रतितोला २५ ले बढेर १८५० रुपैयाँमा कारोबार भइरहेको महासंघले जनाएको छ। बुधबार चाँदीको मूल्य प्रतितोला १८२५ रुपैयाँ थियो।
नेपालमा बजेटमार्फत भन्सार दर ५ प्रतिशत बिन्दु बढेपछि सुन महँगिने क्रम जारी छ।