बालेनले प्रचण्डमाथि उठाए प्रश्न : ‘कुन नैतिकताले भन्नु म देश बनाउँदै छु भनेर ‘
काठमाडौं महानगरपालिकाका मेयर बालेन साहले बञ्चरेडाँडामा फोहोर लिएर जाने सडकको अवस्था खराब भएकाले सत्तारूढ माओवादी केन्द्रका अध्यक्ष पुष्पकमल दाहाल ‘प्रचण्ड’ को नामै किटान गर्दै फोहोर व्यवस्थापन हुन नसक्नुको एउटा समस्या उजागर गरेका छन्।
हिलाम्य सडकको भिडियो फेसबुकमा पोस्ट गर्दै बालेनले माओवादी केन्द्रका अध्यक्ष प्रचण्डको नैतिकतामाथि पनि प्रश्न उठाएका छन् । मेयर बालेन शाहले मंगलबार आफ्नो आधिकारिक फेसबुक र ट्विटरमा लेखेका छन्, ‘श्रीमान प्रचण्डज्यू! उपत्यकाको फोहोर लैजान प्रयोग गरिने ककनीको बाटो विगत ८ वर्षदेखि यस्तो हालतमा बनाउने मान्छेको घरमै अंगरक्षकजस्तो बसेर कुन नैतिकताले भन्नु म देश बनाउँदै छु भनेर।’
यो सडक निर्माणको जिम्मा शैलुङ कन्स्ट्रक्सनले पाएको छ । यो ठेकेदार कम्पनीका सञ्चालक शारदाप्रसाद अधिकारी हुन् । उनी हाल माओवादी केन्द्रका अध्यक्ष पुष्पकमल दाहाल प्रचण्ड बस्दै आएको घरको घरबेटीसमेत हुन् ।
शैलुङ कन्स्ट्रक्सनले ठेक्का पाएको आठ वर्षदेखि यो सडक नबन्नुले काठमाडौंको फोहोर व्यवस्थापनमा समस्या उत्पन्न हुँदै आएको छ। मेयर शाहले यसैतर्फ इंगित गर्दै प्रचण्डको नामै किटेर सामाजिक सञ्जालमा लेखेका हुन्।
