पराग्वेसँग पराजित हुँदै चार पटकको विजेता जर्मनी बाहिरियो
चार पटकको विश्व विजेता जर्मनी २०२६ को विश्वकपबाट बाहिरिएको छ। निकै रोमान्चक र नाटकीय बनेको खेलमा पराग्वेले जर्मनीलाई पेनाल्टी सुटआउटमा ४-३ ले हराउँदै अन्तिम १६ मा स्थान बनाएको हो।
निर्धारित ९० मिनेट र त्यसपछि थपिएको ३० मिनेटको अतिरिक्त समय १-१ को बराबरीमा सकिएपछि खेलको निर्णय पेनाल्टी सुटआउटबाट लिइएको थियो।
खेलको ४२औं मिनेटमा जुलियो एन्सिन्सोले हेडमार्फत गोल गर्दै पराग्वेलाई अप्रत्याशित अग्रता दिलाएका थिए।
दोस्रो हाफमा जर्मनीले सुधारिएको प्रदर्शन गर्यो। फ्लोरियान विर्ट्जको पासमा काइ हाभर्ट्जले हेडमार्फत गोल गर्दै खेललाई १-१ को बराबरीमा ल्याए।
जर्मनीका जोनाथन टाहले अतिरिक्त समयमा गोल गरेका थिए, तर रेफ्रीले गोलकिपरमाथि फाउल भएको भन्दै त्यस गोललाई मान्यता दिएनन्।
पेनाल्टीमा जर्मनीको सुरुवात निकै खराब रह्यो। स्टार खेलाडी काइ हाभर्ट्ज र निक भोल्टेमाडे दुवैको प्रहार पराग्वेका गोलकिपर ओर्लान्डो गिलले बचाए।
जर्मनीका ४० वर्षीय भेट्रान गोलकिपर म्यानुएल नोयरले पनि पराग्वेका प्रहारहरू रोकेर जर्मनीलाई खेलमा फर्काउने कोसिस गरेका थिए। तर जर्मनीका जोनाथन टाहको प्रहार पोस्टभन्दा माथिबाट बाहिरिएपछि पराग्वेका जोसे क्यानालेले निर्णायक गोल गर्दै आफ्नो टोलीलाई अन्तिम १६ मा पुर्याए।
खेल सकिएपछि मैदानमा जर्मन खेलाडी र समर्थकहरू आँसुमा डुबेका थिए। यो जितलाई पराग्वेको फुटबल इतिहासकै सबैभन्दा ठूलो र गौरवपूर्ण नतिजा मानिएको छ।
अब पराग्वेले अन्तिम १६ मा फ्रान्स वा स्वीडेनमध्ये एकसँग सामना गर्नेछ। जर्मनीका लागि भने यो विश्वकप निकै निराशाजनक रुपमा अन्त्य भएको छ।
