डा. केसीसँग झुक्यो सरकार

सरकारले अनशनरत चिकित्सक प्रा.डा. गोविन्द केसीसँग वार्ताका लागि शिक्षा, विज्ञान तथा प्रविधि मन्त्रालयका सचिव गोपीनाथ मैनालीको संयोजकत्वमा तीन सदस्यीय समिति गठन गरेको छ ।
चौतर्फी दबाबपछि डा. केसीसँग वार्ता गर्न सरकार बाध्य भएको हो ।
शिक्षामन्त्रीस्तरीय निर्णयबाट सो समिति गठन भएको हो । प्रा डा. केसी गत भदौ २४ देखि जुम्लाबाट अनशन सुरु गरी हाल त्रिवि शिक्षण अस्पताल महाराजगन्जमा छन् ।
सरकारको निर्देशनमा सचिव मैनालीसहितको टोलीले भेटेर अनशन त्याग्न आग्रह गर्दा उनले वार्ता समिति गठन भई आफ्ना माग पूरा गर्नुपर्ने अडान राखेपछि समिति गठन गरिएको हो ।
शिक्षा मन्त्रालयका प्रवक्ता दीपक शर्माका अनुसार समितिमा स्वास्थ्य तथा जनसंख्या मन्त्रालयका सहसचिव डा. गुणराज लोहनी र चिकित्सा शिक्षा आयोगका निर्देशक दिलीप शर्मा छन् ।
सत्तारुढ नेपाल कम्युनिस्ट पार्टी (नेकपा) को मंगलबारको सचिवालय बैठकमा डा. केसीको जीवन रक्षाका सन्दर्भमा छलफल हुँदा प्रधानमन्त्री एवं पार्टी अध्यक्ष केपी ओलीले सो विषयमा सरकार गम्भीर रहेको र वार्ताका लागि प्रक्रिया सुरु भइसकेको बताएका थिए ।
बैठकले कोरोना महामारीको विषम स्थितिमा अनशन अन्त्य गराई वार्ताबाट समस्याको समाधान गर्न डा. केसीलाई आग्रह गरेको थियो ।

डा. केसीको वार्ता टोली

सरकारसँग वार्ता गर्न डा. गोविन्द केसीको तर्फबाट चार सदस्यीय वार्ता टोली बनेको छ ।
सरकारले शिक्षा सचिवको नेतृत्वमा वार्ता टोली बनाएलगत्तै डा. केसीको तर्फबाट पनि डा. जीवन क्षेत्रीको नेतृत्वमा टोली बनेको हो ।
टोलीमा नेपाल चिकित्सक संघका पूर्वअध्यक्ष अञ्जनीकुमार झा, नेपाल चिकित्सक संघका अध्यक्ष डा. लोचन कार्की र अधिवक्ता ओमप्रकाश अर्याल सदस्य छन् ।

चिकित्सक संघद्वारा आन्दोलन घोषणा
सत्याग्रही डा. गोविन्द केसीको जीवनरक्षाको माग गर्दै नेपाल चिकित्सक संघले आन्दोलनको घोषणा गरेको छ ।
वार्ता टोली गठन गर्न दिएको ७२ घन्टे अल्टिमेटम सकिएलगत्तै संघले दबाबमूलक आन्दोलन घोषणा गरेको हो ।
२२ असाज बिहान ९ देखि ११ बजेसम्म देशभरका स्वास्थ्य संस्था तथा अस्पतालहरूमा आकस्मिक र कोभिड–१९ का सेवाबाहेक अन्य स्वास्थ्य सेवा वहिष्कार गर्ने र जनस्वास्थ्यका मापदण्ड तथा सामाजिक दूरी कायम गरेर धर्ना दिने संघले जनाएको छ ।
२३ गते देशभर आकस्मिक र कोभिड–१९ का सेवाबाहेक अन्य स्वास्थ्य सेवा वहिष्कार गर्ने र अर्को सूचना नआएसम्म कालोपट्टी बाँधेर काम गर्ने संघले बताएको छ । साथै, यो अवधिमा पनि वार्ता टनेली गठन गरी डा. केसीको सत्याग्रह अन्त्य नगरिए थप कडा आन्दोलन गर्ने संघको चेतावनी छ ।
६ बुँदे माग राख्दै डा. केसी अनशन बसेको २४ दिन भएको छ तर सरकारले वार्ता गरेको छैन । अनशन बसेको २३ औं दिन शिक्षा सचिवको टोलीले उनलाई भेटेर औपचारिक वार्ता टोली नबनेको भन्दै अनशन अन्त्य गर्न आग्रह गरेको थियो ।