शालीनदीमा राष्ट्रपति पौडेलले गरे पूजा
फोटो

काठमाडौं– राष्ट्रपति रामचन्द्र पौडेलले शंखरापुर नगरपालिकास्थित शालीनदी पुगेर पूजा, अर्चना गरेका छन्।
पौष शुक्ल पूर्णिमादेखि जारी स्वस्थानी व्रत कथाअन्तर्गतको माधवनारायण मेलामा आज बिहान सहभागी राष्ट्रपति सहभागी भएका हुन्।
सो अवसरमा राष्ट्रपति पौडेलले श्री स्वस्थानी र माधवनारायणको दर्शन एवं पूजा अर्चना गरेको शीतलनिवासले जनाएको छ।
उनले शालीनदीमा जल अभिषेक पनि गरे। राष्ट्रपतिले वज्रयोगिनी मन्दिरमा समेत दर्शन एवं पूजा अर्चना गरे।
काठमाडौं २ बाट निर्वाचित सांसद सोविता गौतमको निमन्त्रणामा साँखु पुगेका राष्ट्रपति पौडेलले प्राचीन, ऐतिहासिक, सांस्कृतिक र पर्यटकीय क्षेत्रमा रहेको वज्रयोगिनी मन्दिरको दर्शन गर्न पाउनु आफ्ना लागि खुुसीको विषय भएको बताए।
वज्रयोगिनी मन्दिर पुग्दा शंखरापुर–८ का वडाध्यक्ष पोते थिङ र वडा नं ४ का वडाध्यक्ष सुनबहादुर तामाङलगायत स्थानीयले राष्ट्रपतिको स्वागत गरेका थिए। उनले भृकुटी र स्रङ्चङ् गम्पोसँगको ऐतिहासिक महत्त्व जोडिएको वज्रयोगिनी र धार्मिक एवं ऐतिहासिक महत्त्वको शालीनदी क्षेत्रको विकासका लागि राज्यले विशेष ध्यान दिने विश्वास व्यक्त गरे।
सो अवसरमा सांसद र नगरप्रमुख एवं उपप्रमुखलगायत जनप्रतिनिधिले धार्मिक, सांस्कृतिक र ऐतिहासिक महत्वको क्षेत्र भए पनि शालीनदी क्षेत्रको विकास हुन नसकेको, पुनःनिर्माणका कामले गति लिन नसकेको र कतिपय विकासका काम अधुरै रहेको गुनासो गरेका थिए।
सांसद गौतमले राष्ट्रपतिको उपस्थितिले शालीनदीको थप संरक्षण र व्यवस्थापनमा सरकारको ध्यान केन्द्रित हुने विश्वास व्यक्त गरिन्।
शाली नदी मेलामा हरेक वर्ष झन्डै ३० लाख धर्मावलम्बीले दर्शन गर्ने उनले जानकारी दिइन्।