स्थापना दिवस मनाउँदै कांग्रेस

काठमाडौं–सत्तारुढ नेपाली कांग्रेसले आज ७८औं स्थापना दिवस मनाउँदै छ । नेपालको सबभन्दा पुरानो दल कांग्रेस प्रजातान्त्रिक लडाइँमा अग्र भागमा रहँदै आएको छ।
कांग्रेसले भारतको कोलकातामा नेपाली राष्ट्रिय कांग्रेसको पहिलो अधिवेशन भएको मिति २००३ माघ १२ लाई आधार मानेर हरेक वर्ष स्थापना दिवस मनाउँदै आएको छ।
यस वर्षको स्थापना दिवसमा पार्टी मुख्यालयसहित सातै प्रदेश र जिल्लामा विभिन्न कार्यक्रम गरी स्थापना दिवस मनाइरहेको कांग्रेसले जनाएको छ।
आज दिउँसो २ बजे कांग्रेस केन्द्रीय कार्यालय सानेपामा सभापति शेरबहादुर देउवाको उपस्थितिमा विशेष कार्यक्रम गरिँदै छ।
बीपी कोइरालाको पहलमा २००३ साल माघ १२ सम्म कोलकाताको भवानीपुरमा युवाको पहिलो भेला भएको थियो, जुन भेलाले नेपाली राष्ट्रिय कांग्रेस स्थापना गरेको थियो।
गणेशमान सिंहको प्रस्तावअनुसार भेलाले टंकप्रसाद आचार्यलाई सभापति र बीपी कोइरालालाई कार्यवाहक सभापति चयन गरेको थियो।
स्थापना दिवस समापनपछि कांग्रेसले ‘समुदायमा कांग्रेस’ अभियान पनि सञ्चालन गर्दै छ। ‘समुदायमा जाऔं, जनताका कुरा सुनौं’ नारासहित गाउँ जाने र जनताका आशा, अपेक्षा, सुझाव तथा गुनासा सुन्ने गरी अभियान सञ्चालन गर्न लागिएको कांग्रेसले मुख्यालयले बताएको छ।
अभियानका लागि खटाइने केन्द्रबाट खटाइने केन्द्रीय प्रतिनिधिलाई स्थानीय स्तरमा सेवा प्रवाहको अवस्था, विकास निर्माण र समुदायमा भएका असल अभ्यासको अवलोकन गर्ने जिम्मेवारी दिइएको छ ।
केन्द्रीय प्रतिनिधि बाहेक पदाधिकारी र पूर्वपदाधिकारी समेत प्रत्येक प्रदेशमा पुगेर समुदायमा कांग्रेस अभियानमा सहभागी हुने नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेलले बताए।
अभियानकै क्रममा १६ माघमा सहिद दिवस अवसर पारेर ६ हजार ७४३ वडामा मात्र कार्यक्रम हुने गरी कार्यतालिका बनाइएको छ। अन्तिम दिन माघ २६ मा पूर्वसभापति सुशील कोइरालाको स्मृति दिवससँगै अभियान समापन हुनेछ।

फोटो