निस्दीका गर्भवतीलाई गाउँमै निःशुल्क भिडियो एक्सरे सेवा

पालिकाका सात वटै वडामा रहेका स्वास्थ्य चौकीमार्फत प्रत्येक महिना एक दिन निःशुल्क भिडियो एक्सरे सेवा दिइँदै

पाल्पा– गाउँमा भिडियो एक्सरे सेवा नहुँदा पाल्पाको निस्दी गाउँपालिकाका गर्भवतीलाई सदरमुकाम तानसेन तथा रामपुर धाउनुपथ्र्यो । उनीहरूलाई भिडियो एक्सरे सेवा लिन एक दिन पूरै बिताउनुपथ्र्यो । अब भने यहाँका गर्भवतीलाई सो सेवाका लागि अन्यत्र जाने समस्या टरेको छ ।

पालिकाले गर्भवतीलाई लक्षित गरी निःशुल्क ग्रामीण भिडियो एक्सरे सेवा सञ्चालन गरेको छ । पालिकाका सात वटै वडामा रहेका स्वास्थ्य चौकीमार्फत प्रत्येक महिना एक दिन सेवा दिन थालिएको स्वास्थ्य शाखा संयोजक रेमबहादुर दिशाले जानकारी दिए ।

वडा–१ को बाकामलाङ स्वास्थ्य चौकीमा हरेक महिनाको २३ गते, वडा–२ को सहलकोट स्वास्थ्य चौकीमा २२ गते, वडा–३ को झिरुवास स्वास्थ्य चौकीमा २१ गते, वडा–४ को मित्याल स्वास्थ्य चौकीमा ११ गते, वडा–५ को गल्धा स्वास्थ्य चौकीमा १४ गते, वडा–६ को अर्चले स्वास्थ्य चौकीमा १२ गते तथा वडा–७ को ज्यामिरे स्वास्थ्य चौकीमा १३ गते भिडियो एक्सरे सेवा दिइने उनले बताए ।
११ भदौदेखि उक्त सेवा सुरु गरिएको हो ।

‘प्रदेश सरकारले एक जना तालिम प्राप्त अनमीको व्यवस्था गरेपछि यो सेवा सुरु गरेका हौं’, संयोजक दिशाले भने । गर्भवतीको समस्यालाई ध्यानमा राख्दै पालिकाले उक्त सेवा सुरु गरेको हो ।

गर्भवतीलाई वडामा रहेका स्वास्थ्य संस्थामार्फत हरेक महिना प्रत्येक वडा वडामा समय तय गरेर सेवा प्रवाह गर्न थालिएको उनले बताए । गाउँकै स्वास्थ्य चौकीबाट सेवा पाउँदा उनीहरूलाई ठूलो राहत मिलेको छ । यसअघि तानसेन र रामपुर धाउँदा यातायात, बास बस्नेलगायत समस्या थियो ।

स्थानीय स्तरमै सेवा पाउँदा सास्ती भोग्नुपर्ने समस्या टरेको निस्दी–४ की हिराकुमारी खाम्चाले बताइन् । ‘टाढा जानुपर्ने झन्झटले गर्भवती स्वास्थ्य परीक्षण गर्दैनथे, अब ठूलो राहत पुगेको छ’, उनले भनिन् ।
मेसिन बिग्रिने, स्वास्थ्यकर्मी अभावलगायत समस्याले कतिपय बेला भने सेवा सेवा नलिइकन फर्कनुपर्ने समस्या थियो। निजी क्लिनिकमा महँगीका कारण सेवा लिन समस्या थियो ।