केसीलाई भेट्न टिचिङ पुगे पूर्वराष्ट्रपति

त्रिवि शिक्षण अस्पतालमा अनशनरत डा. गोविन्द केसीलाई भेट्न पूर्वराष्ट्रपति डा. रामवरण यादव महाराजगन्जस्थित टिचिङ अस्पताल पुगेका छन् ।
भेटमा डा. यादवले केसीको स्वास्थ्य अवस्थाबारे जानकारी लिएका थिए । चिकित्सा शिक्षा सुधारको माग राख्दै अनशनरत डा. केसीको स्वास्थ्य अवस्था बुभ्mन पूर्वराष्ट्रपति यादव शुक्रबार त्रिवि शिक्षण अस्पतालमा पुगेका हुन् ।
डा. केसीलाई भेटेपछि पत्रकारहरुसँग कुरा गर्दै पूर्वराष्ट्रपति यादवले चिकित्सा शिक्षा सुधारका लागि जायज माग राखी सत्याग्रह गरेका डा. केसीले जनताको माग उठाएकाले वार्तामार्फत समस्या समाधान गर्न सरकारलाई सुझाव दिए ।
डा. केसीले राख्दै आएका माग पूरा हुने चरणमा रहेको सरकारले बताइसकेको अवस्थामा तत्काल वार्ताको वातावरण निर्माण गरी समस्या समाधान गर्नुपर्ने उनको भनाइ छ ।
ज्यानको प्रवाह नगरी सत्याग्रहमार्फत जनताको मागलाई उठाउँदै आएकाले डा. केसी राष्ट्रको सम्पत्तिको रुपमा रहेको टिप्पणी पूर्वराष्ट्रपति डा. यादवको छ ।
डा. केसीको यो १९ औं सत्याग्रह हो । विभिन्न माग राखी १९ दिन अघिदेखि जुम्लाबाट सत्याग्रह सुरु गरेका डा. केसी अहिले त्रिवि शिक्षण अस्पतालमा छन् । तर, सरकारले १९ दिन बित्दासमेत समस्या समाधानका लागि अहिलेसम्म कुनै पहल गरेको छैन ।