कोरोना जोखिम पूर्वानुमान गर्न नसकिने सरकारको स्वीकारोक्ति

सरकारले नेपालमा कोरोनाको जोखिम अझै पूवार्नुमान गर्न सक्ने अवस्थामा नभएको बताएको छ । सरकारका प्रवक्ता तथा परराष्ट्रमन्त्री प्रदीप ज्ञवालीले नेपालमा कोरोना संक्रमण बढिरहेको र जोखिम कहिलेसम्म रहन्छ भन्ने पूर्वानुमान गर्न नसकिने जानकारी दिएका हुन् ।
‘नेपालमा निरन्तर संक्रमण बढिरहेको छ । कुनै बिन्दुमा पुगेर हामी विस्तारै ओरालो लाग्न सुरु गर्छौं । संक्रमण नियन्त्रणको अवस्थामा जान्छ । अझै पूर्वानुमान गर्न सकिने अवस्था छैन,’ मन्त्रिपरिषद्को निर्णय सुनाउन आयोजित पत्रकार सम्मेलनमा उनले भने ।
सरकारले कोरोनाको जोखिम कम भएर नभई जीवन र जीविकाबीच सन्तुलनको आवश्यकताका कारणले धेरै क्षेत्र खुला गरेको मन्त्री ज्ञवालीले बताए । ‘यो बेला सबैको उच्चस्तरको सतर्कता, साथ र सहयोगको जरुरी छ,’ उनले भने ।
सर्वसाधारणले सरकारी आदेश, निर्देशन र विज्ञको सुझाव मानेकै कारण नेपालमा कोरोनाको भयावह अवस्था आउन नपाएको भन्दै उनले चाडपर्वको बेला थप सतर्क हुनुपर्ने आवश्यकता औंल्याए ।
‘खुला सिमाना भएको मुलुकमा जति भयावह हुन सक्थ्यो, त्यसमा जति जोखिम थियो, यसको तुलनामा कमैै छ,’ मन्त्री ज्ञवालीले भने, ‘तर जोखिम उच्च नै छ । आगामी दिनमा चाडवाडको समय आउँदै छ । स्वास्थ्य सतर्कतालाई कहीँ–कतै पनि कम नगर्न आग्रह गर्छु ।’
सरकारले काठमाडौंमा घरधनी र केही औद्योगिक प्रतिष्ठानले पीसीआर रिपोर्टका लागि सर्वसाधारणलाई बाध्य बनाएको भन्दै त्यस्तो नगर्न आग्रह गरेको छ ।
मन्त्री ज्ञवालीले स्वास्थ्य मन्त्रालय र विश्व स्वास्थ्य संगठनको मापदण्डविपरीत कसैलाई पनि पीसीआर परीक्षणका लागि बाध्य नबनाउन आग्रह गरेका हुन् ।
पीसीआर रिपोर्ट नभई धरधनीले डेरामा बस्नेलाई पस्न नदिएको र औद्योगिक प्रतिष्ठानले काम गर्न नदिएको सुन्नमा आएको भन्दै उनले जबर्जस्ती पीसीआर परीक्षणका लागि बाध्य नपार्न आग्रह गरेका हुन् ।
‘स्वास्थ्य मन्त्रालयको प्रोटोकल छ, विश्व स्वास्थ्य संगठनले जारी गरेको प्रोटोकल छ । त्यसविपरीत जबर्जस्ती परीक्षण गर्नु उचित हुँदैन । त्यसले कुनै परिणाम पनि दिँदैन,’ मन्त्री ज्ञवालीले भने ।

१ हजार ३ सय ५१ जनामा कोरोना पुष्टि

पछिल्लो २४ घन्टामा १ हजार ३ सय ५१ जनामा कोरोना संक्रमण पुष्टि भएको छ ।
देशभरका प्रयोगशालामा १० हजार ८० नमुना परीक्षण गर्दा ४ सय ३६ महिला र ९ सय १५ पुरुषमा संक्रमण पुष्टि भएको हो ।
यससँगै नेपालमा कुल संक्रमितको संख्या ७४ हजार ७ सय ४५ पुगेको छ । उनीहरुमध्ये ४ सय ८१ जनाको मृत्यु भएको छ भने ५४ हजार ६ सय ४० जना संक्रमणमुक्त भएका छन् । पछिल्लो २४ घन्टामा ७ सय ४२ जना संक्रमणमुक्त भएको स्वास्थ्य तथा जनसंख्या मन्त्रालयले जनाएको छ ।
हाल देशरभमा १९ हजार ६ सय २४ संक्रिय संक्रमित छन् । १० हजार ९ सय २९ जना होम आइसोेलेसनमा छन् भने ८ हजार ६९५ संस्थागत आइसोलेसनमा छन् । उनीहरुमध्ये २ सय २५ जनाको आईसीयु र ३१ जनाको भेल्टिलेटरमा उपचार भइरहेको छ ।
मन्त्रालयका अनुसार काठमाडौं उपत्यकामा ८ सय १७ संक्रमित थपिएका छन्, जसमध्ये काठमाडौंका ६ सय ४९ जना, ललितपुरका १ सय ३२ र भक्तपुरका ३६ जना छन् ।
यस्तै, सिराहाका ५५ जना, कैलालीका ५०, मोरङका ४९, मकवानपुरका ४०, सुर्खेतका २९, महोत्तरीका २५, धनुषाका २२, सुनसरी, नवलपुर र रुपन्देहीका २०–२० जना, चितवन र तनहुँका १७–१७ जना, बाँकेका १६, बझाङका १४, अछामका १३, धादिङका ११, सप्तरी र काभ्रे १०–१० तथा पर्सा, सिन्धुपाल्चोक, लमजुङ ७–७ जनामा कोरोना संक्रमण पुष्टि भएको छ ।
सर्लाहीका ६ जना, कपिलवस्तु, गुल्मी र नवलपरासीका ५–५ जना, सिन्धुली र कास्कीका ४–४ जना, बारा, नुवाकोट, गोरखा, पर्वत र स्याङ्जाका ३–३ जना, इलाम, खोटाङ, झापा, तेह्रथुम, भोजपुर, दाङ, बर्दिया, कालीकोट, जाजरकोट, दैलेख र सल्यानका २–२ तथा ओखलढुंगा, संखुवासभा, रौतहट, दोलखा, बाग्लुङ, अर्घाखाँची, प्यूठान र बैतडीका १–१ जनामा संक्रमण देखिएको छ ।