लक्षण भएका संक्रमितलाई मात्र अस्पताल भर्ना गरिने

काठमाडौं
मुलुकमा पछिल्लो समय संक्रमण बढेसँगै अस्पतालमा बेड अभाव हुन थालेपछि सरकारले लक्षण भएकाहरूलाई मात्र अस्पतालमा भर्ना गर्ने निर्णय गरेको छ ।
लक्षण भएका कोरोना संक्रमितलाई मात्र कोभिड–१९ उपचारका लागि तोकिएका अस्पतालहरूमा भर्ना गरिने सरकारले जानकारी दिएको हो ।
बिहीबार बसेको मन्त्रिपरिषद् बैठकले लक्षण नभएका संक्रमितलाई आइसोलेसन सेन्टरमा राख्ने निर्णय गरेको छ । यसका लागि काठमाडौं उपत्यकामा ६ हजार बेडको आइसोलेसन सेन्टर बनाउने घोषणा सरकारले गरेको छ ।
लक्षण नभएका तथा सामान्य लक्षण भएकाहरू होम आइसोलेसनमा बस्न सक्ने अवस्था भए त्यसका लागि स्वास्थ्य मन्त्रालयले तोकेको निकायले अनुमति दिनुपर्नेछ ।
प्रदेश मुख्यमन्त्री तथा मन्त्रिपरिषद्को कार्यालयहरूलाई पनि जोखिमको मूल्यांकन गरेर आइसोलेसन सेन्टर बनाउन सरकारले निर्देशन दिएको छ ।

निजी अस्पतालले पनि सेवा दिनैपर्ने

स्वास्थ्य तथा जनसंख्या मन्त्रालयले कोरोना संक्रमितको उपचारका लागि निजी अस्पताल, मेडिकल कलेज वा प्रतिष्ठानलाई कोभिड अस्पताल बनाउन सक्ने निर्णय भएको सरकारका प्रवक्ता डा. युवराज खतिवडाले बताए ।
मन्त्रालयले हालै निजी तथा सामुदायिक अस्पताललाई कोभिडका बिरामीका लागि २० प्रतिशत बेड छुट्टयाउन र मेडिकल कलेलहरूलाई एक तिहाइ बेड बराबर आइसोलेसन सेन्टर बनाउन निर्देशन दिएको थियो ।
तर निजी अस्पताल र जनस्वास्थ्य विज्ञहरूले भने कोरोना संक्रमित र संक्रमण नभएका बिरामीलाई एउटै अस्पतालमा उपचार गर्दा संक्रमण फैलिन सक्ने र स्वास्थ्यकर्मीको व्यवस्थापन पनि कठिन हुने बताउँदै आएका छन् ।
मन्त्रिपरिषद् बैठकले आईसीयू, भेन्टिलेटर र अक्सिजन र त्यसका लागि चाहिने जनशक्तिको प्रबन्ध गर्न पनि स्वास्थ्य मन्त्रालयलाई निर्देशन दिएको छ ।
पीसीआर परीक्षणलाई बढाउने र कट्याक्ट ट्रेसिङलाई अझ प्रभावकारी बनाउने निर्णय भएको सरकारका प्रवक्ता डा. खतिवडाले बताए ।