नेप्से २८०० विन्दुभन्दा माथि, कारोबार रकम बढ्यो
नेप्से परिसूचक उच्च अंक बढेर बन्द भएको छ। यस दिन नेप्से बढेसँगै २८०० विन्दुभन्दा माथि पुगेको छ। नेप्से परिसूचक ११ कारोबार दिनपछि २८०० विन्दुभन्दा माथि पुगेको हो।
नेप्से परिसूचक ५३.०१ अंक बढेर २८१९.१० विन्दुमा पुगेको छ। त्यस्तै, यस दिन सेन्सेटिभ इण्डेक्स ८.५२ अंक बढेको छ भने फ्लोट इण्डेक्स ३.५५ अंक र सेन्सेटिभ फ्लोट इण्डेक्स ३.०६ अंक बढेको छ।
नेप्सेसँगै यस दिन कारोबार रकम पनि बढेको छ। अघिल्लो कारोबार दिन अर्थात मंगलबार ४ अर्ब १८ करोडको शेयर खरिदबिक्री भएको बजारमा यस दिन ३२१ स्टकको ७२ हजार ५२८ पटकको कारोबारमा ७ अर्ब ६८ करोड ३३ लाख ८६ हजार रुपैयाँबराबरको १ करोड ४९ लाख ८६ हजार कित्ता शेयर खरिदबिक्री भएको छ।
विकास हाइड्रोपावरको शेयर यस दिन पनि सकारात्मक सर्किट लेभलमा कारोबार भएको छ। यस दिन सो कम्पनीको शेयरमूल्य ४७ रुपैयाँ बढेर ५१७ रुपैयाँ २० पैसामा अन्तिम कारोबार भएको छ। त्यस्तै, यस दिन समता लघुवित्त वित्तीय संस्थाको शेयरमूल्य करिब साढे ९ प्रतिशत बढेको छ भने ग्रीन भेन्चर्सको शेयरमूल्य ८ प्रतिशतभन्दा बढी बढेको छ। यस दिन १०.२५ प्रतिशत केबिएल डिबेञ्चर २०८६ को मूल्य सर्वाधिक ५.७९ प्रतिशत घटेको छ।
