निजामती कर्मचारीलाई नागरिकका सेवामा जुटिरहन प्रधानमन्त्री देउवाको आग्रह
जनताका कामलाई नअल्झाएर छिटोछरितो गर्न प्रधानमन्त्री देउवाको कर्मचारीलाई सुझाव
काठमाडौं–प्रधानमन्त्री शेरबहादुर देउवाले मुलुकको विकास निर्माणमा कर्मचारीतन्त्रको महत्त्वपूर्ण जिम्मेवारी रहेको बताएका छन् । जनताको सबैभन्दा अगाडि भएर काम गर्ने कर्मचारी भएकाले नागरिकमैत्री सेवा दिनुपर्नेमा उनको जोड छ ।
१९औं निजामती सेवा दिवस अवसरमा बुधबार आयोजित कार्यक्रममा कर्मचारीकै सहयोगबाटै समग्र मुलुकको विकासका काम अघि बढ्ने उनले बताए । प्रधानमन्त्री देउवाले कर्मचारीले सहयोग नगर्दासम्म मुलुकको विकास हुन नसक्ने धारणा राखे । ‘हामीलाई जनताले मत दिएर जिताए मात्र सरकारमा आउने हो’, उनले भने, ‘तर कर्मचारी स्थायी सरकार हो । मुलुक बनाउने तपार्इंहरूको हातमा छ ।’
उनले कर्मचारीलाई आवश्यक सेवा सुविधा दिन सरकार तयार रहेको बताए । गुणस्तरीय र प्रभावकारी सेवा प्रवाहमा कर्मचारीलाई विशेष ध्यान दिन प्रधानमन्त्री देउवाले आग्रह गरे ।
कार्यक्रममा संघीय मामिला तथा सामान्य प्रशासनमन्त्री राजेन्द्रप्रसाद श्रेष्ठले निजामती प्रशासन उत्कृष्ट प्रशासनको रूपमा हुनुपर्ने बताए । उनले अहिलेको निजामती प्रशासन डिजिटल प्रणालीमा जानुपर्ने र जनताको काम छिटोछरितो रूपमा गर्न आग्रह गरे ।
‘जुन काम गर्नुपर्ने हो । त्यो काम एकै कोठाबाट हुनुपर्दछ’, उनले भने, ‘एउटा फाइल अर्को कोठामा घुमाउँदा तीन दिन बित्छ । त्यसैले कार्यगत एकता प्रणालीमामार्फत काम हुनुपर्दछ ।’
संघीय निजामती सेवा विधेयक अर्थ र कानुन मन्त्रालयले राय दिनेबित्तिकै संसद्मा टेबल गर्ने उनको भनाइ छ । विधेयकमा छुटेका कुरालाई आधिकारिक ट्रेड युनियनसँग छलफल गरेर टुंग्याइने उनले बताए ।
मुख्य सचिव शंकरदास बैरागीले विगतका कमी–कमजोरी आँैल्याउँदै निजामती कर्मचारी प्रशासन अगाडि बढ्नुपर्नेमा जोड दिए ।
सामान्य प्रशासन मन्त्रालयका सचिव अर्जुनप्रसाद श्रेष्ठले समग्र प्रशासन सुधारका लागि निजामती कर्मचारी लागिरहेको सुनाए ।
कार्यक्रममा यस वर्षको निजामती पुरस्कार पाउने व्यक्तिको नाम घोषणा गरिएको थियो । प्रत्येक वर्ष दिवसको अवसरमा उत्कृष्ट काम गर्ने कर्मचारीमध्ये एक जनालाई सर्वोकृष्ट, १० जनालाई उत्कृष्ट र ३० जनालाई निजामति कर्मचारी पुरस्कार प्रदान गर्ने गरिन्छ । यस वर्ष ‘व्यावसायिक र सिर्जनशील प्रशासनः विकास, समृद्धि र सुशासन’ नारासहित यो दिवस मनाइएको छ ।
