सौर्य एयरको विमान दुर्घटना, १९ यात्रुको मृत्यु
काठमाडौं–काठमाडौंबाट पोखरा उड्नै लाग्दा सौर्य एयरको विमान आज बिहान त्रिभुवन अन्तर्राष्ट्रिय विमानस्थलमा दुर्घटनामा परेको छ। जहाज दुर्घटनामा हालसम्म १९ जनाको मृत्यु भएको त्रिभुवन विमानस्थलले पुष्टि गरेको छ। चालक दलका सदस्यसहित यात्रु रहेको विमान उड्ने क्रममा विमानस्थलको धावनमार्गमा चिप्लिएर दुर्घटनामा परेको विमानस्थल कार्यालयले जानकारी दिएको हो।
विमानमा आगलागी भएको र आगलागी नियन्त्रण गर्न तीनवटै निकायका सुरक्षाकर्मी परिचालन गरिएको नेपाली सेनाका प्रवक्ता गौरवकुमार केसीले जानकारी दिए। दुर्घटनाबारे जानकारी लिन गृहमन्त्री रमेश लेखक विमानस्थल पुगेका छन्।
काठमाडौंबाट पोखराका उड्नै लाग्दा आज बिहान ११ बजे सौर्य एयरको जहाज दुर्घटनामा परेको हो। सौर्यको जहाज दुर्घटनामा परेपछि परेपछि त्रिभुवन विमानस्थलबाट हुने आन्तरिक तथा बाह्य उडान बन्द गरिए पनि अहिले खुलेको छ। जहाज दुर्घटनामा परेपछि आन्तरिक विमानस्थल वरपर ठूलो आगलागीको मुस्लो देखिएको छ। जहाज पूरै जलेको अवस्थामा देखिन्छ।
हालसम्म जहाजमा कति यात्रु थिए यकिन नभए पनि विमानस्थल पदाधिकारीले १९ यात्रु रहेको आशंका गरेका छन्। हालसम्म चार जनाको शव निकालिएको विमानस्थलका प्रवक्ता प्रेमनाथ ठाकुरले बताए। पोखरामा सौर्यको नियमित उडान हुने गरेको छैन। दुर्घटनामा घाइते जहाजका क्याप्टेन ३७ वर्षीय मनीषरत्न शाक्यलाई उद्धार गरेर केएमसी अस्पतालमा लगिएको प्रहरीले जनाएको छ।
दुर्घटनामा परेर आगलागी भएको जहाजको उद्धारका लागि अग्निनियन्त्रक, प्रहरी र नेपाली सेना परिचालन गरिएको छ।
