काठमाडौंको फोहोर चार दिनभित्रै उठिसक्ने
काठमाडौं– काठमाडौं महानगरले उपत्यकामा थुप्रिएको सबै फोहोर आगामी चार दिनभित्र व्यवस्थापन गरिसक्ने बताएको छ ।टेकु ट्रान्सफर स्टेसनमा रहेका फोहोरबाहेक सडकमा जथाभावी थुपारिएका सबै फोहर व्यवस्थापनको काम यही सातासम्ममा सक्ने गरी काम भइरहेको कामपा वातारण विभाग प्रमुख सरिता राईले जानकारी दिइन् ।
राईका अनुसार मुख्य सडकमा रहेको सबै फोहोर व्यवस्थापनको काम सकिएको छ । अब भित्री सडकमा रहेको केही फोहोर बाँकी छन् । त्यसको पनि अन्तिम व्यवस्थापनको काम आगामी शनिबारसम्ममा सकिनेछ ।
यसअघिको फोहोर पनि व्यवस्थापन गर्नुपर्ने भएकाले अहिले साविकमा भन्दा बढी दैनिक ३ सय गाडी फोहोर अन्तिम व्यवस्थापनका लागि बञ्चरेडाँडा पुग्ने गरेका छन् ।मुख्य सडकमै कतै फोहोर व्यवस्थापनको काम बाँकी भए वातावरण विभागमा जानकारी दिन पनि प्रमुख राईले नागरिकलाई आग्रह गरेकी छन् ।
केही दिनअघि महानगर प्रमुख बालेन साहले फोहोर व्यवस्थापनमा सहभागी निजी कम्पनीलाई पनि एक साताभित्र सबै फोहोर उठाउन निर्देशन दिएका थिए ।कहिले पानीको कारण बाटो अवरोध त कहिले सिसडोल बञ्चरेडाँडाका स्थानीयका अवरोध गरेपछि दुई महिनादेखि उपत्यकाको फोहोर व्यवस्थापन हुन सकेको थिएन ।
सिसडोल र बञ्चरेडाँडाका स्थानीयले विगतमा महानगरसँग भएको सम्झौताअनुसार सडक मर्मतको काम समयमै सम्पन्न नगरेको, स्थानीयलाई स्वास्थ्य, शिक्षा, रोजगारीको व्यवस्थाजस्ता माग पूरा नगरेको भन्दै कहिले फोहोर बोकेको गाडी तोडफोड र कहिले सडकनै अवरोध गरी व्यवस्थापनको काममा असहयोग गर्दै आएका छन् ।
दुई महिनादेखि विसर्जन हुन नसकेको उपत्यकाको फोहोर व्यवस्थापनका सम्बन्धमा गत साता काठमाडौं, धादिङ र नुवाकोटका प्रमुख जिल्ला अधिकारी, सिसडोल र बञ्चरेडाँडाका स्थानीयबीच भएको चार बुँदे सहमतिपछि बिहीबारदेखि साविकबमोजिम फोहर व्यवस्थापन कार्य हुन थालेको हो ।
हाल महानगरसहित अन्य १७ स्थानीय तहको फोहोरको अन्तिम व्यवस्थापन बञ्चरेडाँडामा हुने गरेको छ ।
