निर्वाचन आयोगद्वारा अर्थ मन्त्रालयसँग करिब ११ अर्ब माग
काठमाडौं– निर्वाचन आयोगले प्रतिनिधिसभा र प्रदेशसभा निर्वाचनमा खर्चिन अर्थ मन्त्रालयसँग १० अर्ब ९८ करोड बढी रकम मागेको छ ।
आयोगले अर्थ मन्त्रालयसँग १० अर्ब ९८ करोड ९८ लाख बजेट मागेको प्रवक्ता तथा सहसचिव शालिग्राम शर्मा पौडेलले बताए । यो बजेट मन्त्रालयबाट निकासा हुन बाँकी छ ।
सरकारले आउँदो ४ मंसिरमा एकै चरणमा प्रतिनिधिसभा र प्रदेश सभाको निर्वाचन गर्ने घोषणा गरेको छ । घोषणासँगै आयोग निर्वाचनको तयारीमा जुटेको छ।
प्रवक्ता पौडेलका अनुसार स्थानीय तह निर्वाचनमा भन्दा यसपालि अनुमानित ५ लाख बढी मतदाता थपिएका छन् । मतदाताको संख्या १ करोड ८२ लाख हुन सक्ने उनले बताए । यसको अन्तिम नामावली आयोगले पछि सार्वजनिक गर्नेछ ।यस्तै, करिब १० हजार ८२५ मतदान स्थल र २२ हजार ५०० मतदान केन्द्र बनाउने आयोगको तयारी छ । यो चुनावका लागि दुई लाख बढी जनशक्ति आवश्यक रहने प्रवक्ता पौडेलले बताए ।
