कांग्रेस भ्रातृ संगठनको महाधिवेशन गराउन निर्देशक समिति गठन
काठमाडौं। नेपाली कांग्रेसले महाधिवेशन सम्पन्न नगरेका पार्टीका भ्रातृ संघहरूको महाधिवेशन सम्पन्न गर्न÷गराउन सोमबार फरक भ्रातृ संघका लागि अधिकारसम्पन्न फरक–फरक निर्देशक समिति गठन गरेको छ। निर्देशक समितिले भ्रातृ संघको महाधिवेशन सम्पन्न गर्न अविलम्ब कार्यतालिका निर्माण गर्ने÷गराउनेछन् भने विधानमा समयानुकूल परिमार्जनदेखि आन्तरिक समस्याको वस्तुगत विश्लेषण गरेर निकासका लागि आवश्यक समन्वय र सहजीकरण गर्नेछन्।
पार्टी सभापति शेरबहादुर देउवाले निर्देशक समितिलाई २०८१ चैत मसान्तसम्म अनिवार्य रूपमा महाधिवेशन सम्पन्न गर्ने गरी कार्यादेश दिएको मुख्यसचिव कृष्णप्रसाद पौडेलले बताए। सो अवधिसम्म संघका तदर्थ कार्यसमितिको समयावधि थप गरिएको छ। पार्टी केन्द्रीय कार्यसमितिको आगामी बैठकमा अनुमोदनका लागि पेस गर्ने गरी उक्त निर्णय नेपाल विद्यार्थी संघ, नेपाल तरुण दल, नेपाल महिला संघ, नेपाल किसान महासंघ, नेपाल दलित संघ, नेपाल लोकतान्त्रिक खेलकुद संघ, नेपाल प्रजातन्त्र सेनानी संघ, नेपाल भूतपूर्व सैनिक संघ, राष्ट्रिय लोकतान्त्रिक अपांगता संघ र नेपाल थारु संघको हकमा लागू हुने उनले जानकारी गराए।
