Exclusive News
Monday, 20 May, 2024
प्रधानमन्त्री प्रचण्डले चौथोपल्ट पाए विश्वासको मत
काठमाडौं–प्रधानमन्त्री पुष्पकमल दाहाल ‘प्रचण्ड’ ले संसद्मा विश्वासको मत प्राप्त गरेका छन्। प्रधानमन्त्रीले १७ महिनामा चौथोपल्ट संसद्बाट विश्वासको मत पाएका हुन्।
प्रतिनिधिसभामा मतदानका लागि उपस्थित १५८ सांसदमध्ये १५७ जनाले प्रचण्डलाई विश्वासको मत दिएका हुन्। कांग्रेसलगायत विपक्षी दलले भने मतदानमा सहभागी भएनन्। कुनै पनि सांसदहरुले विपक्षमा मतदान गरेनन् भने १ जना तटस्थ रहे। सरकारमा सहभागी उपेन्द्र यादव नेतृत्वको जनता समाजवादी पार्टी नेपाल सरकारबाट बाहिरिएपछि प्रधानमन्त्रीले विश्वासको मत लिएका हुन्।
संसद बैठक सुरु भएलगत्तै प्रमुख प्रतिपक्षी नेपाली कांग्रेससहित विपक्षी दलहरु आ–आफ्नो स्थानबाट उठेर विरोध जनाएका थिए। विरोधका बीच सभामुख घिमिरेले विश्वासको मतको प्रस्ताव राख्न प्रधानमन्त्री प्रचण्डलाई अनुमति दिएका थिए।
